విడాకుల వార్తలకు చెక్ పెట్టిన విష్ణు

తమిళ నటుడు విష్ణు విశాల్.. తెలుగు ప్రేక్షకులకు తన సినిమాలతో కంటే బ్యాడ్మింటన్ స్టార్ గుత్తా జ్వాలను ప్రేమించి పెళ్లాడిన సెలబ్రెటీగానే ఎక్కువ పరిచయం. ఆ రకంగానే అతను ఇక్కడ ఎక్కువ పాపులారిటీ సంపాదించాడు. తెలుగులో రిలీజైన తన సినిమాలు ఎఫ్ఐఆర్, మట్టి కుస్తీ మంచి టాకే తెచ్చుకున్నప్పటికీ కమర్షియల్‌గా ఏమంత మంచి ఫలితాన్నందుకోలేదు.

జ్వాల భర్తగా తెలుగు వాళ్ల దృష్టిలో పడుతూ వచ్చిన విష్ణు.. ఆమెను పెళ్లాడిన రెండేళ్లకే విడిపోతున్నట్లు వార్తలు రావడం కలకలం రేపింది. విష్ణు పెట్టిన ఒక ఇన్ డైరెక్ట్ పోస్టును జనాలు తప్పుగా అర్థం చేసుకోవడంతో ఈ దిశగా రూమర్లు ఊపందుకున్నాయి. ఇటీవల విష్ణు ఒక ట్వీట్లో.. నేను ఎంతో ప్రయత్నించాను. కానీ విఫలమవుతూనే ఉంటాను. మరేం పర్వాలేదు. దాన్నుంచి గుణపాఠం నేర్చుకుంటాను. ఈ ఓటమి పూర్తిగా నా తప్పే. దీన్నుంచి గుణపాఠం నేర్చుకుంటాను.. అని పేర్కొన్నాడు.

ఐతే దీన్ని తన వ్యక్తిగత జీవితానికి జనాలు ముడిపెట్టేశారు. ఆల్రెడీ ఒక పెళ్లి విఫలమై జ్వాలను రెండో పెళ్లి చేసుకున్నాడు విష్ణు. మరోవైపు జ్వాలకు కూడా ఇది రెండో వివాహం. వారి వైవాహిక జీవితం సాఫీగానే సాగుతోందని అనుకుంటుండగా ఇలాంటి నర్మగర్భమైన ట్వీట్ వేయడంతో జనాలకు విడాకుల గురించి సందేహాలు పుట్టుకొచ్చాయి. దీని గురించి జరుగుతున్న చర్చను చూసి విశాల్ స్పందించాడు. తాను వృత్తిగత జీవితం గురించి ఈ ట్వీట్ వేశానని.. దాన్ని వ్యక్తిగత జీవితానికి ముడి పెట్టి దారుణమైన ప్రచారం చేశారని.. జ్వాలతో తన ప్రయాణం అంతా బాగానే సాగుతోందని.. తమ ఇద్దరికీ ఒకరిపై ఒకరికి పూర్తినమ్మకం ఉందని అతను స్పష్టం చేశాడు