బాలయ్యను భలే వాడేస్తున్నారే !

ప్రస్తుతం ఓటీటీ సంస్థల మధ్య గట్టి పోటీ ఉంది. మార్కెట్ ను బట్టి ఎవరి ప్రమోషన్ వారు చేసుకుంటూ ముందుకెళ్తున్నారు. అయితే ఆహా మాత్రం ఆ విషయంలో ఇంకాస్త ముందుంది. అవును ఆహా పెట్టినప్పుడు స్వంత హీరో అల్లు అర్జున్ ను , అలాగే కొంత భాగస్వామి అయిన విజయ్ దేవరకొండ ను బాగా వాడుకున్నారు. ఆహా అనే ఓటీటీ ఉందని జనాలకి రీచ్ చేయడంలో బన్నీ కీలక పాత్ర పోషించాడు. ఇక క్రాక్ సినిమాతో ఆహా ఒక్కసారిగా సబ్ స్క్రిప్షన్స్ పెంచేసుకుంది.

ఆ తర్వాత డబ్బింగ్ సినిమాలతో బండి లాగించింది. కానీ ఎప్పుడైతే బాలయ్య టాక్ షోతో ఆహాలో ఎంట్రీ ఇచ్చాడో అక్కడి నుండి ఈ ఓటీటీ అందరికీ చేరువైంది. బాలయ్య అన్ స్టాపబుల్ షోతో ఆహా బాగా లాభపడింది. దీంతో బాలయ్యను ఆహాకి మెల్లగా బ్రాండ్ అంబాసిడర్ చేసేశారు అల్లు అరవింద్. అన్ స్టాపబుల్ షోకి సంబంధం లేకుండా మధ్యలో బాలయ్యను సింగర్స్ షో ఇండియన్ ఐడల్ తెలుగు సీజన్ 1 కి గెస్ట్ తీసుకొచ్చారు.

తాజాగా మరోసారి తెలుగు ఇండియన్ ఐడల్ సీజన్ 2 గ్రాండ్ ఫినాలే కి బాలయ్యను స్పెషల్ గెస్ట్ గా తీసుకొచ్చి నందమూరి హీరోతో ఓ సాంగ్ కి పెర్ఫార్మ్ కూడా చేయించారు. ఏదేమైనా బాలయ్యను ఆహా వాడుకుంటున్నట్లు మరెవరూ వాడలేరేమో. బాలయ్య అప్పిరియన్స్ తో ఇండియన్ ఐడల్ తెలుగు సీజన్ 2 గ్రాండ్ ఫినాలే కి ఏ రేంజ్ వ్యూస్ వస్తాయో చూడాలి.