సర్దార్ దర్శకుడితో మెగాస్టార్ 156 ?

ఈ ఏడాది ప్రారంభంలోనే వాల్తేరు వీరయ్య బ్లాక్ బస్టర్ తో మంచి ఊపుమీదున్న మెగాస్టార్ చిరంజీవి ప్రస్తుతం భోళా శంకర్ ని పూర్తి చేసే పనిలో బిజీగా ఉన్నారు. తన నుంచి ప్రేక్షకులు ఏం కోరుకుంటున్నారో క్లారిటీ రావడంతో అప్పటికప్పుడు స్క్రిప్ట్ లో కొన్ని కీలక మార్పులు చేయించి మరీ సెట్స్ పైకి తీసుకెళ్లారట. సమ్మర్ రిలీజ్ వాయిదా పడటంతో దసరా లేదా దీపావళిని లక్ష్యంగా పెట్టుకుని చిత్రీకరణ జరుపుతున్నారు. నెక్స్ట్ ఎవరితో చేస్తారనే విషయంలో సస్పెన్స్ ఇంకా కొనసాగుతోంది కానీ తాజాగా వచ్చిన లీక్ మేరకు బ్యాక్ గ్రౌండ్ సెట్టింగ్ జరిగిపోయిందట.

దాని ప్రకారం కార్తీకి గత ఏడాది సర్దార్ రూపంలో మంచి హిట్ ఇచ్చిన పీఎస్ మిత్రన్ తో చేయడానికి చిరు ఆసక్తి చూపిస్తున్నట్టు ఇన్ సైడ్ టాక్. స్టైలిష్ యాక్షన్ ఎంటర్ టైనర్లకు సోషల్ మెసేజ్ జోడించి తీయడంతో మిత్రన్ కి మంచి పేరుంది. విశాల్ కు అభిమన్యుడు ఇచ్చింది ఇతనే. అయితే కథ మన టాలీవుడ్ రైటర్ బివిఎస్ రవి అందించబోతున్నట్టు మరో న్యూస్. ఇక్కడే ఇంకో ట్విస్టు ఉంది. ప్రొడక్షన్ కంపెనీ స్టార్ట్ చేసి కనీస హిట్టు లేక ఇబ్బందిపడుతున్న కూతురు సుస్మిత కొణిదెల కోసమే చిరంజీవి దీనికి గ్రీన్ సిగ్నల్ ఇచ్చినట్టు వినికిడి. అధికారిక ప్రకటన రావాల్సి ఉంది.

ఈ మధ్య మెగా కాంపౌండ్ ఎక్కువగా తమిళ దర్శకులకు ప్రాధాన్యం ఇస్తున్నట్టు కనిపిస్తోంది. పవన్ కళ్యాణ్ సముతిరఖనితో ఆల్రెడీ వినోదయ సితం రీమేక్ కోసం చేతులు కలిపాడు. గత ఏడాది గాడ్ ఫాదర్ కోసమే ఇరవై ఏళ్ళ తర్వాత మోహన్ రాజా చెన్నై నుంచి హైదరాబాద్ కు వచ్చాడు. రామ్ చరణ్ కోసం లోకేష్ కనగరాజ్ ఆసక్తి చూపిస్తున్నాడు. ఇప్పుడు మిత్రన్ వంతు వస్తోంది. డివివి దానయ్య నిర్మాతగా వెంకీ కుడుములతో ఎప్పుడో అనౌన్స్ చేసిన ప్రాజెక్టు రద్దయిపోయిన సంగతి తెలిసిందే. ఇంకో వారం పది రోజుల్లో మెగా 156కి సంబంధించిన పూర్తి వివరాలు రావొచ్చు.