నయన్‌ ఫ్యాన్స్.. మళ్లీ ఆమె మీద పడిపోయారు

సౌత్ ఇండియన్ హీరోయిన్లలో నయనతారకున్న ఇమేజ్, ఫాలోయింగే వేరు. కేవలం నయన్ కోసం థియేటర్లకు వచ్చే ప్రేక్షకులు లక్షల్లో ఉంటారు. ఆమె సినిమాలకు హీరోలతో సమానంగా ఓపెనింగ్స్ వస్తుంటాయి. ఈ మధ్య నయన్ కొంచెం డౌన్ అయినట్లు కనిపించినా ఆమె రేంజ్‌ను మాత్రం తక్కువ చేయలేం. ఆమెను చూసి మిగతా హీరోయిన్లకు అసూయ పుట్టడంలో ఆశ్చర్యం లేదు. కాకపోతే అందరూ తమ జెలసీని బయటపెట్టలేరు. మాళవిక మోహనన్ మాత్రం నయన్ విషయంలో ఈ మధ్య తన అక్కసును వెళ్లగక్కేస్తున్నట్లు కనిపిస్తోంది.

కొన్ని నెలల కిందట ఒక ఇంటర్వ్యూలో మాళవిక మాట్లాడుతూ.. నయన్ పేరెత్తకుండా ఒక పెద్ద స్టార్ హీరోయిన్ ఫుల్ మేకప్‌తో హాస్పిటల్ సీన్ చేసిందంటూ కౌంటర్లు వేసింది. దీనికి ఓ ఇంటర్వ్యూలో నయన్ నవ్వుతూ సమాధానం చెప్పింది. మాళవిక పేరెత్తకుండా ఆమె విమర్శించింది తననే అని చెబుతూ.. ఆ సీన్లో మేకప్ లేకుండా నటిస్తానన్నా దర్శకుడు ఒప్పుకోలేదని.. కమర్షియల్ సినిమాల్లో ఇలాంటివి కామన్ అని వివరణ ఇచ్చింది. ఈ సంగతి అలా ఉంచితే.. మాళవిక చేసిన తాజా వ్యాఖ్యలు నయనతార అభిమానులకు కోపం తెప్పించాయి.

హీరోయిన్ల పేరు ముందు ‘లేడీ సూపర్ స్టార్’ అని పెట్టడం తనకు నచ్చని.. వాళ్లను కూడా ‘సూపర్ స్టార్’ అనే పిలవాలని అంది మాళవిక. ఐతే ఈ వ్యాఖ్యల్లో నిజానికి తప్పుబట్టడానికి ఏమీ లేదు. నయన్‌ను టార్గెట్ చేసినట్లు కూడా లేకపోయినా.. ఆమె ఫ్యాన్స్ ఊరుకోలేదు. ప్రస్తుతం లేడీ సూపర్ స్టార్ అనగానే అందరికీ నయనే గుర్తుకు వస్తుంది. సినిమాల్లో ఆమె పేరు ముందు ఆ టైటిలే పడుతోంది. దీంతో నయన్‌ను ఉద్దేశించే మాళవిక ఈ వ్యాఖ్యలు చేసిందంటూ ఫ్యాన్స్ మాళవిక మీద మండిపడుతున్నారు. ఈ వ్యాఖ్యలపై మాళవిక వివరణ ఇచ్చింది. తాను జనరల్‌గా హీరోయిన్లందరినీ ఉద్దేశించి సానుకూల ఉద్దేశంతోనే ఈ వ్యాఖ్యలు చేశానని.. నయనతార అంటే తనకు ఎంతో గౌరవమని.. ఆమెను కించపరిచే ఉద్దేశం తనకు ఎంతమాత్రం లేదని ఆమె చెప్పింది.