వేసవి కళ తప్పబోతోందా?

వేసవి సీజన్ అంటే భారీ చిత్రాల సందడి ఉంటుంది. సెలవుల సమయం కావడంతో ఆ టైంలో సినిమాలకు మంచి వసూళ్లు వస్తాయి. లాంగ్ రన్ ఉంటుంది. అందుకే టాప్ స్టార్లు ఈ సీజన్‌ను టార్గెట్ చేస్తుంటారు. ప్రతి సంవత్సరం పెద్ద హీరోల సినిమాలు మూణ్నాలుగు సమ్మర్ బరిలో ఉంటాయి. గత ఏడాది ఆర్ఆర్ఆర్, భీమ్లా నాయక్, సర్కారు వారి పాట, ఆచార్య, ఎఫ్-3 లాంటి భారీ చిత్రాలు వేసవిలో సందడి చేశాయి.

ఈసారి ఆ స్థాయిలో కాకపోయినా రెండో మూడో అయినా పెద్ద సినిమాలు వేసవి రేసులో ఉంటాయని ఆశించారు అభిమానులు. కానీ వారికి నిరాశ తప్పట్లేదు. టాలీవుడ్ టాప్ స్టార్లలో ఒక్కరి సినిమా కూడా 2023 వేసవిలో రావట్లేదు. ఈ సీజన్‌కే షెడ్యూల్ అయిన సలార్, భోళా శంకర్, హరిహర వీరమల్లు, మహేష్ బాబు 28.. ఒకదాని తర్వాత రేసు నుంచి తప్పుకున్నాయి. కొత్తగా ఇంకే స్టార్ సినిమా ఈ సీజన్‌కు షెడ్యూల్ కాలేదు.

పవన్ కళ్యాణ్, మహేష్ బాబు, ప్రభాస్, అల్లు అర్జున్, జూనియర్ ఎన్టీఆర్, రామ్ చరణ్.. ఇలా ఏ టాప్ స్టార్ సినిమా కూడా ఈ వేసవికి రావట్లేదు. సీనియర్ హీరోలు చిరంజీవి, బాలకృష్ణ, వెంకటేష్, నాగార్జున వీళ్లు కూడా సమ్మర్ రేసులో లేరు. ఈసారి అన్నీ మిడ్ రేంజ్ స్టార్ల సినిమాలే రాబోతున్నాయి వేసవిలో. నాని సినిమా దసరా, రవితేజ సినిమా రావణాసుర మాత్రమే చెప్పుకోదగ్గ పెద్ద సినిమాలు. అఖిల్ సినిమా ‘ఏజెంట్’ రేంజ్ కాస్త పెద్దదే. మిగతావన్నీ ఓ మోస్తరు స్థాయి సినిమాలే.

సమంత ‘శాకుంతలం’, సాయిధరమ్ తేజ్ ‘విరూపాక్ష’, సిద్ధు జొన్నలగడ్డ టిల్లు స్క్వేర్, గోపీచంద్ ‘రామబాణం’, నిఖిల్ ‘స్పై’, నాగచైతన్య ‘కస్టడీ’, వైష్ణవ్ తేజ్-4 లాంటి మీడియం రేంజ్ సినిమాలతోనే ఈ వేసవిలో సరిపెట్టుకోక తప్పట్లేదు. టాప్ స్టార్ల భారీ చిత్రాలేవీ వేసవిలో రాకపోవడం ఆయా హీరోల అభిమానులను నిరాశ పరిచేదే. పెద్ద సినిమాలు లేకపోవడంతో ఈ సమ్మర్ కొంచెం కళ తప్పేలాగే ఉంది.