తెలంగాణలో తొడగొట్టనున్న బాలయ్య

నందమూరి బాలకృష్ణ సినిమాల్లో కథలన్నీ కూడా ఎక్కువగా ఆంధ్రా, రాయలసీమ, అ ప్రాంతాల చుట్టూ తిరుగుతుంటాయి. కొంచెం హైదరాబాద్ టచ్ ఉంటుందే తప్ప.. పక్కా తెలంగాణ నేపథ్యంలో, ఇక్కడి యాసతో బాలయ్య తెరకెక్కిన బాలయ్య సినిమాలు దాదాపుగా లేవనే చెప్పాలి. ఈ ప్రాంత నేపథ్యంలో కొన్ని కథలు తెరకెక్కి ఉండొచ్చేమో కానీ.. బాలయ్య తెలంగాణ యాసలో డైలాగులు చెప్పడం.. పూర్తిగా ఈ ప్రాంతంలోనే కథ నడవడం జరగలేదనే చెప్పాలి. కానీ తొలిసారిగా అనిల్ రావిపూడి బాలయ్యతో ఈ ప్రయోగం చేస్తున్నాడని వెల్లడైంది.

బాలయ్య లేటెస్ట్ మూవీ ‘వీరసింహారెడ్డి’ విజయోత్సవ వేడుకలో అనిల్ ఈ విషయాన్ని స్వయంగా వెల్లడించాడు. ‘వీరసింహారెడ్డి’లో బాలయ్య రాయలసీమ నేపథ్యంలో విశ్వరూపం చూపించాడని.. తన సినిమాలో తెలంగాణలో దూకుడు చూపించబోతున్నాడని అనిల్ చెప్పాడు.

“బాలకృష్ణ గారితో నేను చేస్తున్న సినిమా ఒక షెడ్యూల్ పూర్తయింది. ఆ సినిమా కథా చర్చల్లో కానీ.. షూటింగ్ టైంలో కానీ ఆయనతో మాట్లాడుతుంటే అభిమానులను ఎంతగా దృష్టిలో పెట్టుకుంటారో అర్థమైంది. ఒక సినిమా చేస్తున్నపుడు మామూలు ప్రేక్షకులతో పాటు అభిమానులకు కూడా అది నచ్చాలని ఎంతో కేర్ తీసుకుంటారు. అందుకే ప్రతి సినిమాలోనూ ‘ఎన్.బీ.కే’ టచ్ యాడ్ చేస్తారు. ఆ ‘ఎన్.బీ.కే’ టచ్‌తోనే ‘వీరసింహారెడ్డి’ వచ్చింది. నేను తీస్తున్న 108వ సినిమా కూడా ఆ టచ్‌తోనే రాబోతోంది. కాకపోతే ఈసారి అన్న రాయలసీమలో కాదు తెలంగాణలో దిగుతుండు. బాక్సాఫీస్ ఊచకోత షురూ చేస్తడు. కలెక్షన్లతో కుర్బానీ పెడతడు” అంటూ తెలంగాణ యాసలో మాట్లాడుతూ ఈ సినిమా బ్యాక్‌డ్రాప్ గురించి వివరించాడు అనిల్ రావిపూడి.

నేపథ్యం వరకు తెలంగాణ అయితే ఓకే కానీ.. బాలయ్య తెలంగాణ యాసలో డైలాగులు చెబుతాడంటేనే ఏదోలా అనిపిస్తోంది. నిజంగా ఆ యాస బాలయ్యకు సెట్ అవుతుందా?