సినిమా కోసం కంగ‌నా ఆస్తుల తాక‌ట్టు

బాలీవుడ్లో లేడీ ఓరియెంటెడ్ సినిమాల‌కు కేరాఫ్ అడ్ర‌స్‌గా మారిన క‌థానాయిక కంగ‌నా ర‌నౌత్. కెరీర్లో కొన్నేళ్లు రెగ్యుల‌ర్ గ్లామ‌ర్ రోల్సే చేసిన ఆమె.. క్వీన్ ద‌గ్గ‌ర్నుంచి రూటు మార్చింది. ఫ్యాన్ ఫాలోయింగ్, మార్కెట్ పెర‌గ‌డంతో ఆ త‌ర్వాత లేడీ ఓరియెంటెడ్ సినిమాల‌కే ప‌రిమితం అయింది. మ‌ణిక‌ర్ణిక లాంటి సినిమాలు ఆమె ఇమేజ్‌ను మ‌రింత పెంచాయి. కానీ ఆ త‌ర్వాత కంగ‌నాకు వ‌రుస‌గా ఎదురు దెబ్బ‌లు త‌గులుతున్నాయి.

గ‌త ఏడాది కంగ‌నా ప్ర‌ధాన పాత్ర పోషించిన ధ‌క‌డ్ పెద్ద డిజాస్ట‌ర్ అయింది. దాదాపు వంద కోట్ల బ‌డ్జెట్లో తెర‌కెక్కిన ఈ చిత్రం థియేట‌ర్ల నుంచి ప‌దో వంతు కూడా వ‌సూలు చేయ‌లేక‌పోయింది. అయినా స‌రే.. కంగ‌నా త‌గ్గ‌ట్లేదు. మ‌ళ్లీ ఒక లేడీ ఓరియెంటెడ్ మూవీని లైన్లో పెట్టింది. అదే.. ఎమ‌ర్జెన్సీ. ఈ చిత్రానికి ద‌ర్శ‌కురాలు, నిర్మాత కూడా కంగ‌నానే. ఈ సినిమా కోసం త‌న ఆస్తుల‌న్నీ తాక‌ట్టు పెట్టిన‌ట్లుగా కంగ‌నా ఓ ఇంటర్వ్యూలో వెల్ల‌డించ‌డం విశేషం.

అనేక క‌ష్ట న‌ష్టాల‌కు ఓర్చి తాను ఎమ‌ర్జెన్సీ సినిమా తీసిన‌ట్లు కంగ‌నా తెలిపింది. ఎమ‌ర్జెన్సీ సినిమా షూటింగ్ పూర్త‌యిన సంద‌ర్భంగా ఆమె మాట్లాడుతూ.. ఈ రోజు ఎమ‌ర్జెన్సీ షూట్ పూర్తి చేశాను. నా జీవితంలో అద్భుత ఘ‌ట్టం చివ‌రి ద‌శ‌కు చేరుకుంది. ఈ సినిమా కోసం నేను ఏ క‌ష్టం ప‌డ‌లేద‌ని అంద‌రూ అనుకుంటున్నారు. కానీ వాస్త‌వం వేరు. నాకు సంబంధించిన ఆస్తుల‌న్నీ ఈ సినిమా కోసం తాక‌ట్టు పెట్టాను.

ఇక ఆరోగ్య ప‌రంగా ఈ సినిమా చేస్తూ చాలా ఇబ్బంది ప‌డ్డాను. డెంగీ బారిన ప‌డి ర‌క్త క‌ణాల సంఖ్య భారీగా ప‌డిపోయింది. అయినా త‌ట్టుకుని నిల‌బ‌డ్డాను. షూటింగ్‌కు హాజ‌ర‌య్యాను. ఈ స‌మ‌స్య‌ను అధిగ‌మించ‌డం చాలా క‌ష్ట‌మైంది. ఇది నాకు పున‌ర్జ‌న్మ అని కంగ‌నా పేర్కొంది. ఐతే ఈ సినిమాకు కంగ‌నా పేరు నిర్మాత‌గా పడ్డ‌ప్ప‌టికీ ఎమ‌ర్జెన్సీ కాన్సెప్ట్ కాంగ్రెస్ పార్టీకి వ్య‌తిరేకం కాబ‌ట్టి ఈ సినిమాకు బీజేపీ ఫండింగ్ చేస్తున్న‌ట్లు భావిస్తున్నారు.