ర‌జినీకాంత్‌కు విల‌న్‌గా సునీల్

క‌మెడియ‌న్‌గా వైభ‌వం చూస్తున్న రోజుల్లో హీరోగా మారి.. అందాల రాముడు, మ‌ర్యాద రామ‌న్న‌, పూల‌రంగ‌డు లాంటి హిట్ల‌తో మంచి ఊపులోనే సాగాడు సునీల్. కానీ ఆ త‌ర్వాత మాస్ హీరోగా ఎదిగిపోదామ‌ని ట్రై చేసి వ‌రుస‌గా ఎదురు దెబ్బ‌లు తిన్నాడు. ఒక ద‌శ‌లో ఇటు హీరోగా సినిమాలు వ‌ర్క‌వుట్ కాక‌.. అటు క‌మెడియ‌న్‌గా మ‌ళ్లీ క్లిక్ కాలేక బాగా ఇబ్బంది ప‌డ్డాడు సునీల్.

హీరోగా చేశాక కామెడీ ఇమేజ్ దెబ్బ తిన‌డం అత‌డికి చేటు చేసింది. ఇండ‌స్ట్రీలో త‌న‌కున్న మంచి పేరు, ప‌రిచ‌యాల వ‌ల్ల అవ‌కాశాల‌కైతే లోటు లేకపోయింది కానీ.. అత‌డి క్యారెక్ట‌ర్లే క్లిక్ కాలేదు కొంత కాలం పాటు. అలాంటి టైంలోనే సీరియ‌స్ విల‌న్ పాత్ర‌ల వైపు మ‌ళ్లాడు సునీల్. మొద‌ట్లో అవి కూడా తేడా కొట్టినా.. నెమ్మ‌దిగా జ‌నాలు ఆ పాత్ర‌ల‌కు అల‌వాటు ప‌డ్డారు. క‌ల‌ర్ ఫొటో, పుష్ప సినిమాల‌తో సునీల్‌కు విల‌న్‌గా మంచి పేరే వ‌చ్చింది.

ఇప్పుడు నెగెటివ్ రోల్స్‌లో కెరీర్ పీక్స్‌ను అందుకుంటున్నాడు సునీల్. అత‌ను సూప‌ర్ స్టార్ ర‌జినీకాంత్ సినిమాలో విల‌న్ పాత్ర చేస్తుండ‌డం విశేషం. సూప‌ర్ స్టార్ ప్ర‌స్తుతం జైల‌ర్ అనే సినిమా చేస్తున్న సంగ‌తి తెలిసిందే. డాక్ట‌ర్, బీస్ట్ చిత్రాల ద‌ర్శ‌కుడు నెల్స‌న్ దిలీప్ కుమార్ స‌న్ పిక్చ‌ర్స్ బేన‌ర్లో డైరెక్ట్ చేస్తున్న సినిమా ఇది.

ఈ సినిమాపై భారీ అంచ‌నాలే ఉన్నాయి. ఇందులో శివ‌రాజ్ కుమార్, మోహ‌న్ లాల్ లాంటి లెజెండ‌రీ న‌టులు కీల‌క పాత్ర‌లు పోషిస్తున్నారు. వీరికి సునీల్ కూడా తోడ‌య్యాడు. డిఫ‌రెంట్ గెట‌ప్, లుక్‌లో సునీల్ కొంచెం వ‌యొలెంట్‌గా క‌నిపిస్తున్న లుక్‌తో అత‌డిని ప‌రిచ‌యం చేసింది జైల‌ర్ టీం.

ఈ పోస్ట‌ర్ చూస్తే సునీల్‌ది నెగెటివ్ రోల్ అని అర్థ‌మైపోతుంది. చిత్ర వ‌ర్గాల స‌మాచారం ప్రకారం అత‌ను ప్ర‌ధాన విల‌న్ల‌లో ఒక‌డ‌ట‌. ర‌జినీ సినిమా అంటే ప‌లు భాష‌ల్లో పాన్ ఇండియా లెవెల్లో రిలీజ‌వుతుంది. ఆల్రెడీ పుష్ప‌తో వ‌చ్చిన పేరుకు.. ఈ సినిమా కూడా వ‌ర్క‌వుట్ అయితే సునీల్ రేంజే మారిపోవ‌డం ఖాయం.