దిల్ రాజుకు ఇది గట్టి దెబ్బే

అగ్ర నిర్మాత దిల్ రాజు పేరు ఈ మధ్య కాలంలో ఎంతగా వార్తల్లో నిలిచిందో తెలిసిందే. అనువాద చిత్రమైన ‘వారసుడు’కు థియేటర్ల కేటాయింపు విషయంలో ఆయన తీవ్ర విమర్శలు ఎదుర్కొన్నారు. ఈ విషయంలో బాగా నెగెటివిటీ పెరిగిపోవడంతో ఇలా అయితే కష్టమని.. తన సినిమాను మూడు రోజులు వాయిదా వేసుకుని ‘వాల్తేరు వీరయ్య’, ‘వీరసింహారెడ్డి’ చిత్రాలకు రిలీఫ్ ఇచ్చాడు.

ఒక దశలో మొండిగా తన సినిమా ప్రయోజనమే ముఖ్యమన్నట్లు వ్యవహరించిన రాజు.. చివరికి వెనక్కి తగ్గక తప్పలేదు. కొందరు దీన్ని త్యాగంలా చూసినా.. తప్పకే రాజు తగ్గాడన్న చర్చ నడిచింది. ఈ త్యాగం వల్ల ‘వారసుడు’ ఓపెనింగ్స్ మీద గట్టి ప్రభావమే పడింది. ‘వారిసు’కు తమిళంలో డివైడ్ టాక్ రావడం, అక్కడ ఓపెనింగ్స్ అంచనాలకు తగ్గట్లు లేకపోవడంతో తెలుగు వెర్షన్ మీద కూడా ఆ ఎఫెక్ట్ పడింది.

లేటుగా వచ్చినప్పటికీ రాజు ‘వారసుడు’కు చెప్పుకోదగ్గ సంఖ్యలో, మంచి మంచి స్క్రీన్లు తీసుకుని సినిమాను రిలీజ్ చేశాడు కానీ.. అది ఓపెనింగ్స్‌కు పెద్దగా కలిసి రాలేదు. సినిమాకు ఇక్కడ మరింత డివైడ్ టాక్ వచ్చింది. ఇలాంటి సినిమాలు తెలుగోళ్లు బోలెడు చూసేశారు. వాల్తేరు వీరయ్య, వీరసింహారెడ్డి ఉండగా.. ఇక విజయ్ సినిమాను మనోళ్లు ఏం పట్టించుకుంటారు? అందులోనూ టాక్ సరిగా లేని సినిమాను సంక్రాంతి టైంలో ఏం చూస్తారు? మొత్తంగా ‘వారసుడు’ పెద్దగా ప్రభావం చూపట్లేదు తెలుగులో.

పోనీ తమిళంలో అయినా విజయ్‌కి పెద్ద హిట్టిచ్చారా అంటే అదీ లేదు. విజయ్ గత సినిమాలతో పోలిస్తే దీనికి వసూళ్లు తక్కువగా ఉన్నాయి. పూర్తి నెగెటివ్ టాక్ తెచ్చుకున్న ‘బీస్ట్’కే దీని కంటే ఎక్కువ ఓపెనింగ్స్ వచ్చాయి. అజిత్ సినిమా ‘తునివు’ దీని మీద పూర్తి ఆధిపత్యం చూపిస్తోంది. అటు తమిళంలో విజయ్‌కు ఆశించిన హిట్ ఇవ్వక.. తెలుగులో మార్కెట్ పెంచక రాజుకు చేదు అనుభవం తప్పట్లేదు.