అప్పుడే శుభవార్త చెప్పేసిన పూర్ణ

కథనాయికగా అవకాశాలు తగ్గిపోయినప్పటికీ.. ఓవైపు క్యారెక్టర్ రోల్స్ చేస్తూ.. మరోవైపు టీవీ షోల్లో సందడి చేస్తూ యాక్టివ్‌గానే ఉంటూ వచ్చింది ‘అవును’ భామ పూర్ణ. ఈ ఏడాదే ఆమె షానిద్ అసిఫ్ అలీ అనే దుబాయి కుర్రాడితో ఎంగేజ్మెంట్ చేసుకోవడం.. రెండు నెలల కిందటే అతణ్ని పెళ్లి చేసుకోవడం తెలిసిందే. హీరోయిన్లు పెళ్లి చేసుకున్న వెంటనే పిల్లల్ని కనడం అరుదు.

కొన్నేళ్లు గ్యాప్ తీసుకుని ఆ తర్వాత శుభవార్త చెబుతుంటారు. కానీ పూర్ణ మాత్రం అలా ఆలస్యం చేయలేదు. పెళ్లయిన రెండు నెలలకే గుడ్ న్యూస్ చెెప్పేసింది. తాను తల్లి కాబోతున్న విషయాన్ని ఒక వీడియో ద్వారా ఆమె సోషల్ మీడియాలో అభిమానులతో షేర్ చేసుకుంది. అక్టోబరు 25న పెళ్లి చేసుకున్న పూర్ణ.. 9 వారాల్లోనే తల్లి కాబోతున్న విషయాన్ని వెల్లడించడంతో ఆమె మిగతా హీరోయిన్లతో పోలిస్తే చాలా డిఫరెంట్ అనే కామెంట్లు చేస్తున్నారు నెటిజన్లు. 33 ఏళ్ల పూర్ణ అసలు పేరు షమ్మా ఖాసిమ్.

పూర్ణ అనే పేరు చూసి ఆమె హిందూ అమ్మాయి అనుకుంటారు కానీ.. తను ముస్లిం. చాలామందికి పెళ్లి టైంలో కానీ ఈ విషయం తెలియలేదు. ఈ మలయాళీ భామ శ్రీహరి ప్రధాన పాత్ర పోషించిన ‘శ్రీ మహాలక్ష్మి’ చిత్రంతో తెలుగు తెరకు పరిచయం అయింది. ఆ తర్వాత ఆమె నటించిన ‘అవును’ పెద్ద హిట్టయి తనకు మంచి పేరు తెచ్చిపెట్టింది.

ఆ తర్వాత సీమ టపాకాయ్, అవును-2, రాజుగారి గది, మామ మంచు అల్లుడు కంచు లాంటి సినిమాల్లో ఆమె నటించింది. కథానాయికగా అవకాశాలు తగ్గిపోయాక క్యారెక్గర్ రోల్స్‌లోనూ మెరుస్తోంది పూర్ణ. ఇటీవల ‘అఖండ’ సినిమాలో క్యారెక్టర్ రోల్ చేసింది. ఆమె అనేక టీవీ షోల్లోనూ తరచుగా కనిపిస్తోంది. ఆమె భర్త అసిఫ్ అలీ యూఏకీకి చెందిన వ్యాపారవేత్త.