ర‌ష్యాలో పుష్ప అడ్రస్ గ‌ల్లంతు

స‌రిగ్గా ఏడాది కింద‌ట విడుద‌లైన అల్లు అర్జున్-సుకుమార్ మూవీ పుష్ప పాన్ ఇండియా స్థాయిలో బ్లాక్‌బ‌స్ట‌ర్ అయింది. డివైడ్ టాక్‌ను త‌ట్టుకుని ఆ చిత్రం బాక్సాఫీస్ ద‌గ్గర బ‌లంగా నిల‌బ‌డింది. తెలుగులో కంటే కూడా ఇత‌ర భాష‌ల్లో ఆ చిత్రం పెద్ద హిట్ట‌యింది. ఆ సినిమా పాట‌లు.. బ‌న్నీ మేన‌రిజ‌మ్స్ ఎంత పాపుల‌ర్ అయ్యాయో ప్ర‌త్యేకంగా చెప్పాల్సిన ప‌ని లేదు.

అంత‌ర్జాతీయ స్థాయిలో అప్లాజ్ రావ‌డంతో ఈ మ‌ధ్యే చిత్ర బృందం.. పుష్ప చిత్రాన్ని ర‌ష్య‌న్ భాష‌లోకి అనువ‌దించింది. ఊరికే నామ‌మాత్రంగా డ‌బ్ చేసి రిలీజ్ చేయ‌డం కాకుండా.. అల్లు అర్జున్, సుకుమార్, ర‌ష్మిక మంద‌న్నా, దేవిశ్రీ ప్ర‌సాద్ క‌లిసి ర‌ష్యాకు వెళ్లి సినిమాను గ‌ట్టిగా ప్ర‌మోట్ చేశారు కూడా. ఇందుకోసం దాదాపు ఏడు కోట్ల దాకా బ‌డ్జెట్ అయిన‌ట్లు కూడా వార్త‌లు వ‌చ్చాయి. కానీ ఇంతా చేసి ఏ ప్ర‌యోజ‌నం లేకుండా పోయింద‌న్న‌ది ర‌ష్య‌న్ ట్రేడ్ వ‌ర్గాల మాట‌.

పుష్ప ర‌ష్య‌న్ వెర్ష‌న్‌కు కనీస స్థాయిలో కూడా స్పంద‌న లేక‌పోయింది. కోట్లు ఖ‌ర్చు పెట్టి ప్ర‌మోష‌న్లు చేస్తే సినిమాకు అక్క‌డ ల‌క్ష‌ల్లో మాత్ర‌మే వ‌సూళ్లు వ‌చ్చాయ‌ట‌. డ‌బ్బింగ్, రిలీజ్ ఖ‌ర్చులు కూడా వెన‌క్కి రాలేద‌ని తెలుస్తోంది. డిసెంబ‌రు 8న సినిమా రిలీజ్ కాగా.. గ‌త వారం రోజుల్లో ర‌ష్య‌న్ వెర్ష‌న్ గురించి చిత్ర బృందం ఒక్క మాటా మాట్లాడ‌లేదంటేనే ప‌రిస్థితి ఏంటో అర్థం చేసుకోవ‌చ్చు. అక్క‌డ సినిమాకు ఓ మోస్త‌రు స్పంద‌న వ‌చ్చినా అల్లు అర్జున్ పీఆర్ టీం మామూలు హ‌డావుడి చేసేది కాదు. అంద‌రూ గ‌ప్‌చుప్ అన్న‌ట్లు ఉన్నారంటే సినిమా ర‌ష్యాలో వాషౌట్ అని తేలిపోతోంది.

బ‌న్నీ మేన‌రిజ‌మ్స్‌ను ఐరోపా క్ఈర‌డా ఈవెంట్ల‌లో అనుక‌రించార‌ని.. అత్యుత్సాహంతో కోట్లు ఖ‌ర్చు పెట్టిన చిత్ర బృందానికి ర‌ష్య‌న్లు పెద్ద షాకే ఇచ్చిన‌ట్లున్నారు. ఈ ప‌రిణామం బ‌న్నీ అండ్ కోకు చాలా చికాకు తెప్పించేదే అన‌డంలో సందేహం లేదు.