పుష్ప-2 టీజర్ ‘కథ’

గత ఏడాది ఇదే నెలలో ‘పుష్ప’ అనే సినిమా రేపిన సంచలనం అంతా ఇంతా కాదు. తెలుగులో మంచి అంచనాల మధ్య రిలీజైన ఈ సినిమాకు ఇతర భాషల్లో అంతగా హైప్ లేదు. కానీ హిందీ, తమిళ భాషల్లో తెలుగును మించి ఈ సినిమా విజయం సాధించింది. ఉత్తరాది జనాలను అయితే ‘పుష్ప’ మామూలుగా ఊపేయలేదు. అక్కడి నుంచి ఆ సినిమా క్రేజ్ ఇంటర్నేషనల్ లెవెల్‌కు వెళ్లిపోయింది. దీంతో ‘పుష్ప-2’ మీద అంచనాలు అమాంతం పెరిగిపోయాయి. ఆ అంచనాలను అందుకునే దిశగా సుకుమార్ అండ్ టీం బాగానే కష్టపడుతోంది.

ముందు అనుకున్నదానికంటే ఎక్కువ సమయం తీసుకుని స్క్రిప్టు తీర్చిదిద్దుకుని ఇటీవలే ‘పుష్ప-2’ చిత్రీకరణ మొదలుపెట్టారు. ముందుగా ఒక కాన్సెప్ట్‌తో టీజర్ విజువల్స్ తీసుకుని.. ఆ తర్వాత రెగ్యులర్ షూట్‌కు వెళ్లారు. ఇంకో ఐదు రోజుల్లో ‘పుష్ప’ వార్షికోత్సవం జరగబోతోంది. ఆ రోజే ‘పుష్ప-2’ ఫస్ట్ టీజర్ లాంచ్ చేయబోతున్నట్లు సమాచారం.

ఒక సెన్సేషనల్ ఫస్ట్ లుక్‌తో పాటు ‘పుష్ప-2’ కాన్సెప్ట్ టీజర్ కూడా ఈ సందర్భంగా విడుదల చేయబోతున్నట్లు సమాచారం. ‘పుష్ప-2’లో బన్నీ పులితో ఫైట్ చేయబోతున్నాడని కొంత కాలంగా జోరుగా ప్రచారం జరుగుతున్న సంగతి తెలిసిందే. అందుకోసం బన్నీ శిక్షణ కూడా తీసుకున్నట్లు వార్తలొచ్చాయి. ఐతే ‘పుష్ప-2’ టీజర్ పులి చుట్టూనే తిరుగుతుందట కానీ.. పులితో ఫైట్ లాంటిదేమీ ఉండదన్నది విశ్వసనీయ సమాచారం.

పుష్ప అడవిలో అడుగు పెడితే పులి అతణ్ని చూసి వెనుకడుగు వేయడం.. ఈ క్రమంలో ‘‘అడవిలో జంతువులు నాలుగు అడుగులు వేశాయంటే పులి వచ్చిందని అర్థం. అదే పులి నాలుగు అడుగులు వేసిందంటే పుష్ప రాజ్ వచ్చాడని అర్థం’’ అనే డైలాగ్‌ బ్యాగ్రౌండ్లో వినిపిస్తుందట. ఈ డైలాగ్‌ ఆల్రెడీ సోషల్ మీడియాలో లీక్ అయి చక్కర్లు కొడుతోంది. టీజర్ కథ ఇలా ఉంటే.. దీంతో పాటుగా రిలీజ్ చేయబోయే ఫస్ట్ లుక్‌లో బన్నీ ఒక స్టన్నింగ్ అవతారంలో కనిపించనున్నాడని సమాచారం. ఆ అవతారం ఎవరి ఊహకూ అందని విధంగా ఉంటుందట.