ట్రైలర్ టాక్: ఈ రొమాన్స్ గెలిపిస్తుందా?

టాలీవుడ్లో మంచి టాలెంట్ ఉన్న యువ నటుల్లో సత్యదేవ్ ఒకడు. ఇటీవలే ‘గాడ్ ఫాదర్’ సినిమాతో అతడి ప్రతిభ ఎలాంటిదో అందరికీ తెలిసింది. అందులో పెర్ఫామెన్స్ పరంగా చిరునే డామినేట్ చేశాడంటే తన టాలెంట్ ఏంటో అర్థం చేసుకోవచ్చు. నెగెటివ్ అనే కాక క్యారెక్టర్ రోల్స్‌లోనూ అదరగొడుతున్న సత్యదేవ్‌కు సోలో హీరోగా మాత్రం బ్రేక్ రావట్లదు.

ఇప్పటికే చాలా ప్రయత్నాలు చేసి విఫలమైన అతను.. ఇప్పుడు ‘గుర్తుందా శీతాకాలం’ చిత్రంతో ప్రేక్షకులను పలకరించబోతున్నాడు. తమన్నా లాంటి పెద్ద హీరోయిన్ ఇందులో ఒక కథానాయికగా నటించింది. మేఘా ఆకాశ్‌తో పాటు మరో కొత్తమ్మాయి ఇందులో సత్యదేవ్‌తో రొమాన్స్ చేసింది. ఈ నెల 9న ‘గుర్తుందా శీతాకాలం’ థియేటర్లలోకి దిగబోతున్న నేపథ్యంలో రిలీజ్ ట్రైలర్ లాంచ్ చేశారు. అది చూస్తే ఇది ఫుల్ లెంగ్త్ రొమాంటిక్ మూవీ అనిపిస్తోంది.

ఆటోగ్రాఫ్, ప్రేమమ్, థాంక్యూ సహా చాలా చిత్రాలను గుర్తు చేసేలా ఉంది ‘గుర్తుందా శీతాకాలం’. ఒక కుర్రాడి స్కూల్ ఏజ్ నుంచి మొదలుపెట్టి 30 ఏళ్ల వయసు వచ్చే వరకు వివిధ దశల్లో వేర్వేరు అమ్మాయిలతో అతడి రొమాంటిక్ లైఫ్‌ను చూపించే చిత్రంలా ఇది కనిపిస్తోంది. లైన్ పరంగా పైన చెప్పుకున్న సినిమాలతో పోలిక ఉన్నా.. నరేషన్ కొంచెం భిన్నంగా ఉండేలా ఉంది.
ఇంతకుముందు రిలీజ్ చేసిన ట్రైలర్లో ఫన్ డోస్ పెద్దగా కనిపించలేదు. ఫీల్, ఎమోషన్ మీదే దృష్టిపెట్టలేదు. కానీ రిలీజ్ ట్రైలర్ మాత్రం సరదా సరదాగా సాగిపోయింది. ఫన్, రొమాన్స్ రెండూ ఉన్న యూత్ ఫుల్ మూవీ ఇదనే సంకేతాలు ఇచ్చారు. ముగ్గురమ్మాయిలతో హీరో రొమాంటిక్ సీన్లను కూడా చూపించారు. అందర్లోకి ఆటోమేటిగ్గా తమన్నానే హైలైట్ అయింది.

కారణాలేంటో కానీ ఈ సినిమా ప్రమోషన్లకు దూరంగా ఉన్న తమన్నా..డబ్బింగ్ కూడా చెప్పినట్లు లేదు. ఈ మధ్య చాలా సినిమాలకు తనే డబ్బింగ్ చెప్పుకుంది. ఈ చిత్రంలో మాత్రం ఆమెకు వేరెవరో డబ్బింగ్ చెప్పారు. ఆ సంగతి పక్కన పెడితే కన్నడ హిట్ ‘లవ్ మాక్‌టైల్’కు రీమేక్‌గా నాగశేఖర్ అనే దర్శకుడు రూపొందించిన ఈ రొమాంటిక్ మూవీ అయినా సత్యదేవ్‌కు సక్సెస్ అందిస్తుందేమో చూడాలి.