టాలీవుడ్‌కు ఇంకో అడివి శేష్ దొరికాడు

కేవలం నటనకు పరిమితం కాకుండా సినిమాకు స్క్రిప్టు రాయడమే కాక.. మేకింగ్‌లోనూ తమ వంతు పాత్ర పోషించి, అందులోనూ సక్సెస్ అయిన హీరోలు చాలా అరుదుగా ఉంటారు. టాలీవుడ్లో అలాంటి హీరోల్లో ముందు నిలిచేది అడివి శేష్. కర్మ, కిస్ అనే రెండు సినిమాల్ని స్వీయ దర్శకత్వంలో రూపొందించి, నిర్మించి నటించాడు శేష్. కానీ అవి చేదు అనుభవాన్ని మిగిల్చాయి.

కానీ ఆ తర్వాత దర్శకత్వానికి దూరంగా ఉంటూ కథ, స్క్రీన్ ప్లేల్లో అతను కీలకంగా ఉన్న క్షణం, గూఢచారి అద్భుత ఫలితాన్నందుకున్నాయి. ఇప్పుడు టాలీవుడ్‌లో ఇలాంటి మరో హీరో దొరికాడు. అతనే.. సిద్ధు జొన్నలగడ్డ. ఇటీవలే ‘కృష్ణ అండ్ హిజ్ లీల’తో అతను తన టాలెంట్ అంతా చూపించాడు.

ఈ చిత్రానికి కథ, స్క్రీన్ ప్లే, సంభాషణల్లో సిద్ధు పాత్ర ఉంది. దర్శకుడు రవికాంత్ పేరెపుతో అతను స్క్రిప్టు రాశాడు. సినిమాలో అందుకు క్రెడిట్ కూడా ఇచ్చారు. విశేషం ఏంటంటే.. ఇంతకుముందు తాను నటించిన ‘గుంటూరు టాకీస్’కు కూడా రచనా సహకారం అందించాడు సిద్ధు. ఐతే దానికి అంతగా గుర్తింపు రాలేదు. అందులో అతడి పాత్ర మరీ పెద్దదేమీ కాదు.

ఐతే ‘కృష్ణ అండ్ హిజ్ లీల’తో నటుడిగా, రచయితగా సిద్ధు ప్రతిభ ఏంటో అందరికీ అర్థమైంది. దర్శకుడు రవికాంత్ కూడా సిద్ధు గురించి చాలా బాగా చెబుతున్నాడు. దీంతో అతడిపై ఇండస్ట్రీ జనాలకు గురి కుదిరింది. తాజాగా సిద్ధు ‘నరుడి బ్రతుకు నటన’ పేరుతో ఓ కథ రాశాడు. అది సితార ఎంటర్టైన్మెంట్స్ వాళ్లకు నచ్చింది. ఓ కొత్త దర్శకుడు ఈ చిత్రాన్ని రూపొందించనున్నాడు. త్వరలోనే ఈ చిత్రం గురించి అధికారిక ప్రకటన రానుంది.