లవ్ టుడేకి చిక్కొచ్చి పడిందే

ఊహించినట్టే లవ్ టుడే స్లో స్టార్ట్ తో మొదలై ఫుల్ పికప్ అయిపోయింది. ఏబి సెంటర్స్ లో ఇట్లు మారేడుమిల్లి ప్రజానీకంని ఓవర్ టేక్ చేసి పూర్తి ఆధిపత్యం చెలాయిస్తోంది. ముఖ్యంగా యూత్ ఎగబడుతున్న తీరు భారీ లాభాలకు గ్యారెంటీ ఇస్తోంది. మొదటి రోజే రెండు కోట్లకు పైగా గ్రాస్ రావడం అసలే ఇమేజ్ లేని హీరోకి అరుదుగా జరుగుతుంది. అందులోనూ డబ్బింగ్ మూవీకి ఇలాంటి రెస్పాన్స్ దక్కడం ఈ మధ్య కాలంలో జరగలేదు. నిర్మాత దిల్ రాజు చెప్పినట్టు ఇది సెన్సేషన్ అవ్వడం ఖాయమే. అంతా బాగానే ఉంది కానీ లవ్ టుడేకి కొత్తగా ఓ చిక్కొచ్చి పడింది.

ఒరిజినల్ తమిళ వెర్షన్ వచ్చే వారం డిసెంబర్ 2 నుంచి నెట్ ఫ్లిక్స్ లో స్ట్రీమింగ్ కాబోతున్నట్టు ఓటిటి వర్గాల సమాచారం. ఇది ముందస్తుగా చేసుకున్న ఒప్పందం కావడంతో డేట్ మార్చడానికి లేదు. అయితే తెలుగు ఆడియో ఉండకపోయినా సబ్ టైటిల్స్ తో అర్థం చేసుకునే అవకాశం ఉన్నప్పుడు ఇంట్లో కూర్చుని ఎంజాయ్ చేద్దామనుకునే జనాలు గట్టిగానే ఉంటారు. అధికారిక ప్రకటన ఇవాళో రేపో వచ్చేస్తుంది. ఇక్కడ మంచి రన్ లో ఉన్నప్పుడు ఇలా జరగడం షాకే. నిజానికి లవ్ టుడేకి ముందు అనుకున్న తేదీ నవంబర్ 18. మసూద కోసం మార్చాల్సి రావడం ఇలా ఎఫెక్ట్ ఇచ్చింది

ఏది ఏమైనా ఇప్పుడున్న పరిస్థితుల్లో డబ్బింగ్ అయినా రీమేక్ అయినా వీలైనంత త్వరగా ప్రేక్షకుల ముందుకు తీసుకురావడం చాలా అవసరం. లేదంటే దాని ప్రభావం థియేటర్ కలెక్షన్ల మీద పడుతుంది. లవ్ టుడే రెండో వారంలో ప్రవేశించేనాటికి హిట్ 2 ఒకటే చెప్పుకోదగ్గ రిలీజ్. అది కూడా అన్ని వర్గాలను టార్గెట్ చేసింది కాదు కనక ఆ వీక్ ని కూడా వాడుకునే అవకాశం ఉంది. అప్పుడే కాదు డిసెంబర్ 9 కూడా జనాన్ని ఇట్టే ఆకట్టుకుంటే కంటెంట్ పెద్దగా కనిపించడం లేదు. మొత్తానికి మంచి జోరుమీదున్న లవ్ టుడేకి ఇప్పుడీ పరిణామం ఒకరకంగా స్పీడ్ బ్రేకరే.