అవతార్-2.. మిడ్ నైట్ ధమాకా

ఇప్పటిదాకా హాలీవుడ్ సినిమాలు ఇండియన్ బాక్సాఫీస్‌లో మంచి వసూళ్లు సాధించడం, మన సినిమాలకు పోటీ ఇవ్వడమే చూశాం. కానీ త్వరలో ఓ హాలీవుడ్ సినిమా ఇండియన్ బాక్సాఫీస్‌ను సునామీలా ముంచెత్తడం.. వసూళ్ల పరంగా సరికొత్త రికార్డులు నెలకొల్పడం.. ఆ సినిమా చూడడం కోసం మన ప్రేక్షకులు తహతహలాడిపోవడం.. టికెట్లు దొరక్క అల్లాడిపోవడం చూడబోతున్నాం. ఈ ఉపోద్ఘాతం ‘అవతార్-2’ గురించే అని ఈపాటికే అర్థమై ఉంటుంది.

ఇప్పటిదాకా ఇండియాలో హాలీవుడ్ సినిమాల హవా అనగానే అందరికీ ‘ఎవెంజర్స్: ది ఎండ్ గేమ్’యే గుర్తుకు వస్తుంది. ఆ సినిమా ఇక్కడి సూపర్ స్టార్ల సినిమాల స్థాయిలో బాక్సాఫీస్ దగ్గర ఆధిపత్యం చలాయించింది. డిసెంబరు 16న రాబోతున్న ‘అవతార్-2’కు సంబంధించి హంగామా ఇంకో లెవెల్లో ఉండబోతోందన్నది స్పష్టం. 2009లో ‘అవతార్’ ఎలాంటి ప్రభంజనం సృష్టించిందో తెలిసిందే.

అలాంటి సినిమాకు సీక్వెల్ కావడం, దీని ట్రైలర్లు ఒక రేంజిలో ఉండడంతో ‘అవతార్-2’కు హైప్ మామూలుగా లేదు. దీనికి పోటీగా ఏ భాషలోనూ చెప్పుకోదగ్గ సినిమాలేవీ రిలీజ్ చేసే సాహసం చేయడం లేదు. డిసెంబరు 16 నుంచి వారం రోజుల పాటు ఇండియన్ బాక్సాఫీస్‌ను ‘అవతార్-2’కే రాసిచ్చేయబోతున్నారు.

మల్టీప్లెక్సులు, సింగిల్ స్క్రీన్లు అని తేడా లేకుండా మెజారిటీ థియేటర్లలో ఈ సినిమానే ఆడబోతోంది. ఈ సినిమాకు నెలకొనబోయే డిమాండ్ ఎలా ఉంటుందో అంచనా వేసి ఇండియాలో పలు సిటీల్లో ముందు రోజు అర్ధరాత్రి నుంచే ‘అవతార్-2’ స్పెషల్ షోలను ప్రదర్శించబోతున్నారట. కొన్ని నగరాల్లో 24 గంటల పాటు సినిమా ప్రదర్శనకు అనుమతులు తీసుకుంటున్నారట. తొలి వీకెండ్లో విరామం లేకుండా షోలు ప్రదర్శించబోతున్నట్లు సమాచారం. ఇలా ఓ హాలీవుడ్ సినిమాలకు మిడ్ నైట్, తెల్లవారుజామున షోలు పడడం ఇండియాలో ఇప్పటిదాకా జరగలేదు. సినిమా అంచనాలకు తగ్గట్లు ఉండాలే కానీ.. ‘అవతార్-2’ ఇండియన్ బాక్సాఫీస్ రికార్డులను తిరగరాయడం ఖాయంగా కనిపిస్తోంది.