అవతార్-4, 5 రావాలంటే..

అవతార్.. ప్రపంచ సినీ చరిత్రలోనే కనీ వినీ ఎరుగని రీతిల ో వెండితెరపై అద్భుత అనుభూతిని కలిగించిన చిత్రం. అలాగే నభూతో అన్న తరహాలో వసూళ్ల రికార్డులనూ నెలకొల్పిన సినిమా అది. అప్పటికే ‘టైటానిక్’ అద్భుతాన్ని ఆవిష్కరించిన జేమ్స్ కామెరూన్.. దశాబ్ద కాలం పైగా కష్టపడి ఈ సినిమా తీశాడు. ‘అవతార్’ అసాధారణ విజయం సాధించాక మరింత సమయం వెచ్చించి ‘అవతార్-2’ను రెడీ చేశాడు. వచ్చే నెల 16నే ఈ చిత్రం ప్రేక్షకుల ముందుకు రాబోతోంది. దీనిపై అంచనాలు ఏ స్థాయిలో ఉన్నాయో ప్రత్యేకంగా చెప్పాల్సిన పని లేదు.

కాగా ఈ సినిమా విడుదలకు ముందే ‘అవతార్’ ఐదు భాగాలుగా వస్తుందని కామెరూన్ వెల్లడించిన సంగతి తెలిసిందే. చాలా ముందుగానే ఇంకో మూడు సినిమాలకు ఆల్రెడీ రిలీజ్ డేట్లు కూడా ఇచ్చేశాడు.

కానీ అవతార్-4, 5 భాగాలు కచ్చితంగా వస్తాయనే గ్యారెంటీ లేదని ఇంతకుముందే కామెరూన్ సంకేతాలు ఇచ్చాడు. ఇప్పుడు ఇదే విషయమై స్పష్టమైన ప్రకటన చేశాడు. అవతార్-2 తాను ఆశించిన స్థాయిలో విజయం సాధించకపోతే, ఇది ఫ్లాప్ అయితే అవతార్-4, 5 రాబోవని కామెరూన్ తేల్చేశాడు. అవతార్-2 ఫలితాన్ని బట్టే 4, 5 భాగాల కోసం పని చేయాలా వద్దా అన్నది తన టీం నిర్ణయించుకుంటుందని, ఇది ఫ్లాప్ అయితే ఆ పని ఆపేస్తామని ఆయన చెప్పాడు.

ఐతే ‘అవతార్-3’కి సంబంధించి షూట్‌తో పాటు పోస్ట్ ప్రొడక్షన్ చాలా వరకు పూర్తయిందని.. ఆ సినిమా మాత్రం కచ్చితంగా వస్తుందని చెప్పాడు కామెరూన్. ఆ సినిమా వచ్చే ఏడాది చివర్లోనే విడుదల కావాల్సి ఉంది. ఐతే అవతార్-2 మీద ఉన్న హైప్, వైడ్ రిలీజ్‌ను బట్టి చూస్తే కమర్షియల్‌గా మాత్రం ఈ సినిమా అసాధారణ ఫలితాన్ని అందుకునే అవకాశాలే కనిపిస్తున్నాయి. టాక్‌తో సంబంధం లేకుండా ఇప్పటిదాకా ఉన్న అన్ని వసూళ్ల రికార్డులనూ ఇది బద్దలు కొడుతుందనే భావిస్తున్నారు. మరి ఈ సినిమా సక్సెస్‌ను కామెరూన్ ఎలా కొలుస్తాడన్నది చూడాలి.