వాల్తేరు వీర‌య్య స్టోరీలైన్ ఇదేనా?

నెల కింద‌ట గాడ్ ఫాద‌ర్ సినిమాతో సంద‌డి చేశాడు మెగాస్టార్ చిరంజీవి. ద‌స‌రా కానుక‌గా రిలీజైన ఈ చిత్రం ఆచార్య తాలూకు చేదు జ్ఞాప‌కాల‌ను చాలా వ‌ర‌కు చెరిపివేసింద‌నే చెప్పాలి. తొలి వారాంతం వ‌ర‌కు ఈ సినిమా మంచి వ‌సూళ్లు రాబ‌ట్టింది. కాక‌పోతే ఆ త‌ర్వాత సినిమా అనుకున్న స్థాయిలో బ‌లంగా నిల‌బ‌డ‌లేక‌పోయింది.

ఓవ‌రాల్‌గా ఈ సినిమా చిరుకు ఓ మోస్త‌రు ఫ‌లితాన్నందించింద‌ని చెప్పాలి. ఇక మెగా అభిమానుల దృష్టి వాల్తేరు వీర‌య్య మీదికి మ‌ళ్లింది. సంక్రాంతి కానుక‌గా ఈ చిత్రం విడుద‌ల కాబోతున్న సంగ‌తి తెలిసిందే. గాడ్ ఫాద‌ర్ రీమేక్ కావ‌డం వ‌ల్ల ప్రి రిలీజ్ బ‌జ్ పెద్ద‌గా లేదు. అంత‌కుముందు ఆచార్య ప‌రిస్థితి తెలిసిందే. వాల్తేరు వీర‌య్య అన్ని ర‌కాలుగా అభిమానుల‌ను అల‌రిస్తుంద‌నే అంచ‌నాలు ఉన్నాయి. ఈ సినిమా క‌థ గురించి సామాజిక మాధ్య‌మాల్లో ఒక ఆస‌క్తిక‌ర ప్ర‌చారం జ‌రుగుతుండ‌డం విశేషం.

వాల్తేరు వీర‌య్య‌లో మాస్ రాజా ర‌వితేజ ఓ కీల‌క పాత్ర పోషిస్తున్న సంగ‌తి తెలిసిందే. క‌థ‌లో అత‌డి పాత్రకు చాలా ప్రాధాన్య‌మే ఉంటుంద‌ట‌. అత‌డిది చిరు సోద‌రుడి పాత్ర అని.. త‌న మీద ఒక అవినీతి ముద్ర ప‌డి అప్ర‌తిష్ట పాలైతే.. దాన్ని చెరిపివేసేందుకు చిరు చేసే ప్ర‌య‌త్న‌మే ఈ సినిమా అని అంటున్నారు. చిరుకు ఎలివేష‌న్ ఇస్తూనే ర‌వితేజ ప్రాధాన్యం కూడా త‌గ్గ‌కుండా సినిమా ఉంటుంద‌ట‌. ర‌వితేజ పాత్ర నిడివి దాదాపు 40 నిమిషాలు ఉంటుంద‌ట ఈ చిత్రంలో.

ఇప్ప‌టికే షూటింగ్ పూర్తి చేసుకుని పోస్ట్ ప్రొడ‌క్ష‌న్ ద‌శ‌లో ఉన్న ఈ చిత్రానికి వ‌చ్చే నెల‌లో ఫ‌స్ట్ కాపీ తీయ‌బోతున్నారు. మైత్రీ మూవీ మేక‌ర్స్ నిర్మాణంలో తెర‌కెక్కుతున్న ఈ సినిమాను జ‌న‌వ‌రి 12న రిలీజ్ చేసే అవ‌కాశాలున్నాయి. శ్రుతి హాస‌న్ క‌థానాయిక‌గా న‌టించిన ఈ చిత్రానికి దేవిశ్రీ ప్ర‌సాద్ సంగీత ద‌ర్శ‌కుడు.