బండ్ల గణేష్ క్రాకర్స్ ఖర్చెంతో తెలుసా?

ప్రముఖ నిర్మాత, నటుడు బండ్ల గణేష్ గురించి పరిచయం అక్కర లేదు. సినిమాలైనా, రాజకీయాలైనా…బండ్ల గణేష్ చేసే కామెంట్లు కాక రేపుతుంటాయి. ఈ మధ్యకాలంలో సినిమాలకు కాస్త దూరంగా ఉంటున్న బండ్లన్న…రాజకీయాలకు చాలా దగ్గరవుతున్నట్టుగా కనిపిస్తోంది. ఇక, సినిమా తీస్తే పెద్ద హీరోతో..భారీ బడ్జెట్ తో తీస్తానని చెబుతుండే బండ్లన్న ఏం చేసిన కింగ్ సైజ్ లో చేయాలంటాడు. ఈ క్రమంలోనే రెండేళ్ల క్రితం దీపావళి సందర్భంగా బండ్లన్న టపాసుల కోసం భారీగా ఖర్చుపెట్టాడు.

అంతేకాదు, ఆ టపాసుల ఫొటో నెట్టింట వైరల్ కావడంతో…బండ్లన్నపై నెటిజన్లు సెటైర్లు కూడా వేశారు. టపాసుల కొట్టేమన్నా పెట్టావా అన్నా అంటూ నెటిజన్లు కామెంట్లు చేశారు. అయినా సరే తగ్గేదేలే అన్న రీతిలో ఈ ఏడాది కూడా దీపావళి సందర్భంగా బండ్లన్న భారీగా డబ్బు ఖర్చుపెట్టి టపాసులు కొన్నాడు. అంతేకాదు, ఎంత మొత్తానికి టపాసులు కొన్నారు అని ఓ మీడియా ప్రతినిధి అడిగిన ప్రశ్నకు…బండ్లన్న జవాబివ్వడం కొస మెరుపు.

మొత్తం 4 లక్షల 20 వేల రూపాయలకు క్రాకర్స్ కొన్నానంటూ బండ్లన్న చెప్పిన వైనం ఇపుడు హాట్ టాపిక్ గా మారింది. తన మిత్రులకు గిఫ్ట్ లుగా క్రాకర్స్ పంపిస్తుంటానని బండ్లన్న చెప్పాడు. ఈ ఏడాది తాను కొన్న టపాసుల ఫొటోను బండ్ల గణేష్ తన ట్విటర్ ఖాతాలో షేర్ చేశాడు. తన సొంతూరు షాద్ నగర్ లో తన కుటుంబ సభ్యులతో కలిసి టపాసులతో బండ్ల దిగిన ఫొటో వైరల్ గా మారింది. దీంతో, క్రాకర్స్ కే క్రాక్…బండ్ల గణేషా..మజాకా?.. అట్లుంటది బండ్లన్నతోని అంటూ నెటిజన్లు ట్వీట్లు పెడుతున్నారు. ఏది ఏమైనా బండ్ల గణేష్ టపాసుల ఖర్చు ఇపుడు టాలీవుడ్ లో హాట్ టాపిక్ గా మారింది.