VT 13 దర్శకుడిది పెద్ద బ్యాక్ గ్రౌండే

ఇవాళ అఫీషియల్ గా ప్రారంభోత్సవం జరుపుకున్న మెగా ప్రిన్స్ వరుణ్ తేజ్ 13వ సినిమా తాలూకు ప్రీ లుక్ పోస్టర్ అభిమానుల్లో ఆసక్తి రేపింది. ఇండియన్ ఏవియేషన్ ఆఫీసర్ గా చాలా ఇంటెన్స్ క్యారెక్టర్ ని వరుణ్ పోషించబోతున్నాడు. దీని కోసమే ప్రత్యేకంగా ఫిట్ నెస్ ట్రైనింగ్ కూడా తీసుకున్న ఈ మెగా హీరో గని డిజాస్టర్ తాలూకు దెబ్బ నుంచి త్వరగానే బయటికి వచ్చి దీనికి రెడీ అవుతున్నాడు. అయితే మరోసారి డెబ్యూ దర్శకుడిని నమ్ముకోవడం పట్ల ఫ్యాన్స్ లో అనుమానం లేకపోలేదు. అయితే ఆ అబ్బాయి బ్యాక్ గ్రౌండ్ మాములుగా లేదు.

అతని పేరు శక్తి ప్రతాప్ సింగ్ హడా. ఆర్క్ ఫిలిమ్స్ అనే స్వంత బ్యానర్ ఉంది. పంజాబ్ నేషనల్ లా యూనివర్సిటీ నుంచి బిఏఎల్ఎల్బి చేశాడు. యువతగా ఉన్నప్పుడు చైతన్యవంతమైన కార్యక్రమాలు చేశాడు. ఇండియన్ గవర్నమెంట్, బిజెపి, నెస్ కఫే, మ్యాగీ, సెర్లాక్, హెర్మోసా తదితర సంస్థల ఉత్పత్తులకు వర్క్ చేస్తున్నాడు. ప్రస్తుతం బాలాకోట్ ఎయిర్ స్ట్రైక్స్ మీద రాసుకున్న స్క్రిప్ట్ తోనే వరుణ్ మూవీ బ్యాక్ డ్రాప్ సెట్ చేశాడట. ఇతనికి ఏరియల్ ఫోటోగ్రఫీలో మంచి నైపుణ్యం ఉంది. బాలీవుడ్ లోనూ అనుభవం గడించాడు.

అసిస్టెంట్ డైరెక్టర్ గా బద్రీనాథ్ కి దుల్హనియా, ధఢక్, కేసరి, గుడ్ న్యూస్, మర్దాని 2లకు పని చేశాడు. ఇంత భారీ ప్రొఫైల్ ఉంది కాబట్టే మెగా క్యాంప్ లోకి ప్రవేశించగలిగాడు. సోనీ సంస్థ నిర్మాణ భాగస్వామ్యానికి ముందుకొచ్చింది కూడా అందుకే. సూర్య చేసిన ఆకాశం నీ హద్దురా ఛాయలు కనిపిస్తున్నప్పటికీ ఇది పూర్తిగా దానికేమాత్రం సంబంధం లేని స్టోరీతో సాగుతుందట. గద్దలకొండ గణేష్ తర్వాత వరుణ్ తేజ్ కి సోలో హీరోగా చెప్పుకోదగ్గ సక్సెస్ పడలేదు. ఎఫ్3 హిట్టు కొట్టినా అందులో మేజర్ షేర్ వెంకటేష్ తీసుకున్నారు కాబట్టి ఇప్పుడు చేయబోయేవి చాలా కీలకం.