కేజీఎఫ్ హీరోతో శంక‌ర్ మెగా ప్రాజెక్ట్?

కేజీఎఫ్ సినిమాతో పాన్ ఇండియా లెవెల్లో మాంచి గుర్తింపు సంపాదించాడు య‌శ్. ఐతే ఈ సినిమాతో వ‌చ్చిన ఫాలోయింగ్, ఇమేజ్, మార్కెట్‌ను అత‌నెలా ఉప‌యోగించుకుంటాడ‌న్న విష‌యంలో అంద‌రికీ ఆస‌క్తి ఉంది. క‌న్న‌డ‌లో ప్ర‌శాంత్ నీల్ స్థాయి ద‌ర్శ‌కులు త‌క్కువ‌.

వేరే ద‌ర్శ‌కులు య‌శ్ ఇమేజ్‌కు త‌గ్గ సినిమాలు చేయ‌గ‌ల‌రా లేదా అనే సందేహాలు నెల‌కొన్నాయి. కేజీఎఫ్‌-2 విడుద‌లై నెల‌లు గ‌డుస్తున్నా అత‌ను కొత్త సినిమాను అనౌన్స్ చేయ‌లేదు. కేజీఎఫ్‌-1, 2కు మ‌ధ్య వ‌చ్చిన గ్యాప్‌లో కూడా అత‌ను కొత్త సినిమాను ఓకే చేయ‌లేక‌పోయాడు. య‌శ్ కొత్త చిత్రం గురించి ర‌క‌ర‌కాల ఊహాగానాలు వినిపంచాయి కానీ.. ఏదీ వాస్త‌వ రూపం దాల్చ‌లేదు.

కాగా ఇప్పుడు య‌శ్ ఓ మెగా మూవీతో అంద‌రినీ ఆశ్చ‌ర్యానికి గురి చేయ‌బోతున్న‌ట్లు ప్ర‌చారం జ‌ర‌గ‌బోతోంది. త‌మిళ లెజెండ‌రీ డైరెక్ట‌ర్ శంక‌ర్‌తో అత‌డి కొత్త సినిమా ఉంటుంద‌ట‌. ఈ చిత్రంలో నెట్ ఫ్లిక్స్ వాళ్లు భాగం కాబోతున్నార‌ని.. అలాగే బాలీవుడ్ అగ్ర నిర్మాణ సంస్థ‌లైన ధ‌ర్మ ప్రొడ‌క్ష‌న్స్ (క‌ర‌ణ్ జోహార్), పెన్ మూవీస్ కూడా ఇందులో పార్ట్‌న‌ర్స్ అని అంటున్నారు.

వంద‌ల కోట్ల బ‌డ్జెట్లో ఇండియాలోనే బిగ్గెస్ట్ మూవీగా ఈ చిత్రాన్ని తెర‌కెక్కించ‌డానికి ప్ర‌ణాళిక‌లు జ‌రుగుతున్న‌ట్లు స‌మాచారం. ప్ర‌స్తుతం శంక‌ర్ స‌మాంత‌రంగా ఇండియ‌న్-2, రామ్ చ‌ర‌ణ్ సినిమాల‌ను షూట్ చేస్తున్నాడు. ఇవి రెండూ ఆరు నెల‌ల్లో పూర్త‌వుతాయ‌ని.. వ‌చ్చే ఏడాది ద్వితీయార్ధంలో య‌శ్‌తో ఆయ‌న కొత్త చిత్రం ప‌ట్టాలెక్కుతుంద‌ని ప్ర‌చారం జ‌రుగుతోంది.