లెజెండరీ బ్యానర్ వందో సినిమాకు రంగం సిద్ధం

సూపర్ గుడ్ ఫిలిమ్స్.. దక్షిణాదిన లెజెండరీ స్టేటస్ ఉన్న బ్యానర్. 80, 90 దశకాల్లో అటు తమిళంలో ఇటు తెలుగులో ఎన్నో సూపర్ హిట్ సినిమాలను అందించింది ఈ సంస్థ. రాజా, సూర్యవంశం, నువ్వు వస్తావని… ఇలా సూపర్ గుడ్ ఫిలిమ్స్ నుంచి వచ్చిన కల్ట్ మూవీస్ జాబితా పెద్దదే.

అయితే 2000 తర్వాత ఎదురైన కొన్ని పరాజయాల కారణంగా ఈ సంస్థ జోరు తగ్గింది. గత దశాబ్ద కాలంలో సూపర్ గుడ్ ఫిలిమ్స్ పేరు పెద్దగా వినిపించలేదు. ఇటీవల ఆ సంస్థ మళ్లీ యాక్టివ్ అవుతోంది. తెలుగులో చిరంజీవి హీరోగా నటిస్తున్న గాడ్ ఫాదర్ సూపర్ గుడ్ వారి సినిమానే. తమిళంలోనూ ఆ సంస్థ ఒకటి రెండు సినిమాలు నిర్మిస్తోంది.

కాగా సూపర్ గుడ్ ఫిలిమ్స్ వందో సినిమాకు చేరువ అవుతుండటం విశేషం. దాని గురించి తాజా కబురు బయటికి వచ్చింది. ఈ మైల్ స్టోన్ మూవీలో దళపతి విజయ్ కథానాయకుడిగా నటించనున్నాడు. ఈ విషయాన్ని సూపర్ గుడ్ అధినేత ఆర్.బి.చౌదరి తనయుడు జీవా వెల్లడించాడు. తమ సంస్థ వందో సినిమాలో నటించడానికి అంగీకరించినట్లు అతను తెలిపాడు.

ఈ చిత్రంలో తాను కూడా నటించే అవకాశాలు ఉన్నట్లు కూడా అతను వెల్లడించాడు. తాను పారితోషికం కూడా తీసుకోనని, ఈ సినిమాలో నటించే అవకాశం ఇవ్వమని తన తండ్రికి తెలిపినట్టు జీవా చెప్పడం విశేషం. అయితే ఈ సినిమాకు దర్శకుడు, కథ ఏమీ లాక్ కానట్లే ఉంది. వచ్చే ఏడాది ద్వితీయార్థంలో ఈ మూవీ పట్టాలు ఎక్కే అవకాశం ఉంది. గతంలో సూపర్ గుడ్ సంస్థ లో విజయ్ కొన్ని బ్లాక్ బస్టర్లు ఇచ్చాడు. అతను నటించిన శుభాకాంక్షలు, నువ్వు వస్తావని తమిళ వెర్షన్లు సూపర్ గుడ్ సంస్థ నిర్మించినవే.