బాలీవుడ్.. పాత రోజులు వచ్చాయి

మామూలుగా చూస్తే డబ్బు విలువ తగ్గొచ్చు కానీ.. సినిమాలకు రోజు రోజుకు వసూళ్ల లెక్క పెరగడమే తప్ప తగ్గడం అన్నది ఉండదు. కానీ కరోనా పుణ్యమా అని హిందీ సినిమాల పరిస్థితి దీనికి భిన్నంగా తయారయింది. అక్కడ పెద్ద హీరోల సినిమాలకు తొలి రోజు 30-40 కోట్ల వసూళ్లు అనేది చాలా సామాన్యమైన విషయంగా ఉండేది.

కానీ కరోనా తర్వాత అందులో పది ఇరవై శాతానికి వసూలు పడిపోయాయి. తొలి రోజు వసూళ్లు 10 కోట్లు దాటితేనే మురిసిపోయే పరిస్థితి వచ్చింది. ఇoదుకు కారణాలు ఏంటి అన్నది పక్కన పెడితే బాలీవుడ్ పాత రోజులకు వెళ్ళదేమో అన్న భయాలు పట్టుకున్నాయి. కానీ బ్రహ్మాస్త్ర సినిమా మళ్లీ బాలీవుడ్ కు పునర్వైభవం తెచ్చిపెట్టింది.

తొలి రోజు వరల్డ్ వైడ్ అన్ని భాషల్లో కలిపి 75 కోట్ల రూపాయల గ్రాస్ కలెక్షన్లు రాబట్టిన బ్రహ్మాస్త్ర.. రెండో రోజు కూడా తగ్గలేదు. డివైడ్ టాక్ ను తట్టుకుని నిలబడ్డ ఈ చిత్రం శనివారం ఓవరాల్ గా 50 కోట్ల దాకా వసూలు రాబట్టినట్లు ట్రేడ్ పండితుల అంచనా. ఆదివారం కూడా సినిమాకు అడ్వాన్స్ బుకింగ్స్ గట్టిగా జరిగాయి. తొలి రెండు రోజులకు దీటుగా మూడో రోజు వసూళ్లు వచ్చేలా కనిపిస్తున్నాయి. బ్రహ్మాస్త్ర ఆల్రెడీ 100 కోట్ల మార్కును దాటేసింది. రెండు వందల కోట్ల క్లబ్బు వైపు పరుగులు పెడుతోంది. వీకెండ్ అయ్యాక మేజర్ డ్రాప్ లేకపోతే సినిమా అడుగులు వేస్తున్నట్లే.
విడుదలకు ముందు బాయ్ కాట్ బ్యాచ్ నుంచి విపరీతమైన వ్యతిరేకత ఎదుర్కొని.. రిలీజ్ తర్వాత డివైడ్ టాక్ ను తట్టుకుని సినిమా ఈ స్థాయిలో కలెక్షన్లను రాబడుతోంది అంటే గొప్ప విషయమే. బ్రహ్మస్త్ర రిజల్ట్ కచ్చితంగా బాలీవుడ్ కు గొప్ప రిలీఫ్ అనడంలో సందేహం లేదు. ర‌ణ‌బీర్ క‌పూర్, ఆలియా భట్‌, అమితాబ్ బ‌చ్చ‌న్, నాగార్జున ముఖ్య పాత్రలు పోషించిన బ్రహ్మాస్త్ర చిత్రాన్ని అయాన్ ముఖర్జీ రూపొందించాడు. కరణ్ జోహార్ నిర్మాత.