ఖుషి బ్రాండ్ పని చేస్తుందా?

పవర్ స్టార్ పవన్ కళ్యాణ్ రిఫరెన్స్ లు సినిమాల్లో వాడటం చాలా సార్లు చూసిందే. నితిన్ లాంటి నోటెడ్ స్టార్ తో మొదలుపెట్టి షకలక శంకర్ లాంటి కమెడియన్ దాకా అందరూ పిండేశారు. కాకపోతే వీళ్లంతా ఏ పాటకో సీన్ కో దాన్ని పరిమితం చేశారు కానీ ఏకంగా పవన్ పాత సినిమా బ్రాండింగ్ తో ఓ కథ రాసి రెండు గంటల మూవీ చేయడం మాత్రం ఎప్పుడూ జరగలేదు. జాతిరత్నాలుతో ఊహించని బ్లాక్ బస్టర్ అందుకున్న దర్శకుడు కెవి అనుదీప్ స్వయంగా రచన చేసిన ఫస్ట్ డే ఫస్ట్ షో ఈ కాన్సెప్ట్ తో విడుదలకు రెడీ అవుతోంది.

ట్రైలర్ రిలీజ్ చేశారు. రెండు నిమిషాల వీడియో మొత్తం పవన్ నామస్మరణ ఖుషి తాలూకు మెమోరీస్ తో నింపేశారు. ప్రేమించిన అమ్మాయి ఖుషి మొదటి రోజు మొదటి ఆట టికెట్లు అడిగితే దాన్ని సంపాదించడానికి ఓ కుర్రాడు పడే పాట్లనే సినిమాగా తీసేశారు. వంశీధర్-లక్ష్మినారాయణలు సంయుక్తంగా దర్శకత్వం వహించారు. ఒకప్పుడు కె విశ్వనాథ్ గారితో అద్భుతమైన దృశ్యకావ్యాలని తీసిన పూర్ణోదయా సంస్థ వారసులు ప్రొడ్యూస్ చేసిన చిత్రమిది. లీడ్ పెయిర్ కొత్త మొహాలను తీసుకున్నా మిగిలిన పాత్రలకు భరణి, వెన్నెల కిషోర్, శ్రీనివాస్ రెడ్డి లాంటి సీనియర్లనే పెట్టుకున్నారు.

అంతా బాగానే ఉంది కానీ సోషల్ మీడియాలో చిన్న చిన్న విషయాలకే అర్థం లేకుండా ట్రోల్ చేసుకునే హీరోల అభిమానులు ముక్తకంఠంతో ఇప్పుడీ పవన్ బ్రాండ్ సినిమాని ఎలా రిసీవ్ చేసుకుంటారో చూడాలి. పవర్ స్టార్ ఫ్యాన్స్ కి కనెక్ట్ అయ్యేలా ఉంది కానీ న్యూట్రల్ ఆడియన్స్ మొదటి నుంచి చివరి దాకా ఒకే పాయింట్ మీద నడిచే కథను ఒప్పుకోవడం మీద దీని సక్సెస్ ఆధారపడి ఉంది. ముందు సెప్టెంబర్ 2 విడుదల అన్నారు కానీ ఇప్పుడీ ట్రైలర్ లో మాత్రం కమింగ్ సూన్ ఇన్ థియేటర్స్ అని పెట్టారు. మరి మార్పేదైనా ఉంటుందేమో..