తారక్ ఏదో ఒకటి తేల్చాలి

ఆర్ఆర్ఆర్ వచ్చి అయిదు నెలలు కావొస్తోంది. థియేటర్ రన్ పూర్తి చేసుకుని ఓటిటిలో రికార్డులు నెలకొల్పి శాటిలైట్ ప్రీమియర్ కూడా ఇటీవలే పూర్తి చేసుకుంది. అయినా జూనియర్ ఎన్టీఆర్ కొత్త సినిమా ఇప్పటిదాకా ప్రారంభం కాలేదు. దర్శకుడు కొరటాల శివతో అనౌన్స్ చేసిన ప్రాజెక్ట్ రెగ్యులర్ షూటింగ్ ఎప్పుడు మొదలవుతుందో అర్థం కాక అభిమానులు ఎదురు చూపుల్లోనే కాలం గడుపుతున్నారు. ఈ ఏడాదిలో మిగిలున్నది ఇంకో నాలుగు నెలలు మాత్రమే. ఒకవేళ సెప్టెంబర్ లో స్టార్ట్ చేసినా 2023 వేసవిలోగా పూర్తి చేయడం కష్టమే

మరోవైపు ప్రశాంత్ నీల్ తమ కాంబో వచ్చే సంవత్సరం ఏప్రిల్ లేదా మేలో సెట్స్ పైకి వెళ్తుందని చెప్పడం ఆసక్తి రేపుతోంది. అంటే అప్పటికల్లా కొరటాల మూవీ ఫినిషవుతుందా లేదా అవ్వకపోయినా దీన్ని షురూ చేస్తారా అనేది సస్పెన్స్. మరోవైపు ఉప్పెన ఫేమ్ బుచ్చిబాబు ఎవరి కోసం స్క్రిప్ట్ సిద్ధం చేస్తున్నాడో అంతు చిక్కడం లేదు. పెద్ది టైటిల్ తో గతంలో తారక్ కోసం ఏదో సబ్జెక్టు రెడీ చేశాడనే టాక్ వచ్చింది కానీ ఇప్పటిదాకా ఎలాంటి క్లారిటీ రాలేదు. మొత్తానికి యంగ్ టైగర్ ఫ్యాన్స్ నిరీక్షణ ఇంకొంత కాలం పొడిగించినట్టే.

ప్లానింగ్ లో లోపమో లేక ప్యాన్ ఇండియా ఇమేజ్ ని కాపాడుకునే ప్రయత్నమో తెలియదు కానీ మొత్తానికి ఇంతేసి గ్యాప్ తీసుకోవడం మాత్రం ఇబ్బందులు తెచ్చిపెట్టేదే. కొత్తగా ఆస్కార్ అవార్డులు వచ్చే అవకాశం ఉన్న లిస్టులో జూనియర్ పేరు వినిపించడంతో నిర్ణయం తీసుకోవడంలో ఇంకా ఆలస్యం చేస్తాడేమోనన్న అనుమానం లేకపోలేదు. అరవింద సమేత వీర రాఘవ తర్వాత సోలో హీరోగా తారక్ కనిపించి మూడేళ్లు దాటిపోయింది. అసలు కొరటాల శివ బయటికొచ్చి ఇదుగో ఫలానా డేట్ ని మొదలెట్టేస్తాం అని చెప్పేదాకా ఇది ఆగేలా లేదు