కార్తికేయ‌-3.. ఇంట‌ర్నేష‌న‌ల్‌

ఎనిమిదేళ్ల కిందట చిన్న సినిమాగా విడుద‌లై పెద్ద విజ‌యం సాధించిన సినిమా కార్తికేయ‌. స్వామిరారా మూవీతో చాలా గ్యాప్ త‌ర్వాత‌ ఓ విజ‌యం అందుకుని కెరీర్లో పుంజుకుంటున్న స‌మ‌యంలో వ‌చ్చిన కార్తికేయ పెద్ద హిట్ట‌యి నిఖిల్‌కు స్టార్ ఇమేజ్ తెచ్చింది. ఆ త‌ర్వాత అత‌డికి మ‌రికొన్ని విజ‌యాలు ద‌క్కాయి. అలాగే ఫ్లాపులూ ఎదుర్కొన్నాడు. ఇప్పుడు కొవిడ్, ఇత‌ర కార‌ణాల వ‌ల్ల కెరీర్ కొంచెం డ‌ల్ల‌వ‌గా.. కార్తికేయ‌కు కొన‌సాగింపుగా తెర‌కెక్కిన సినిమా మీద అత‌ను చాలా ఆశ‌లే పెట్టుకున్నాడు.

ఈ శ‌నివార‌మే కార్తికేయ‌-2 ప్రేక్ష‌కుల ముందుకు రానుంది. ఈ నేప‌థ్యంలో మీడియాతో మాట్లాడిన చిత్ర ద‌ర్శ‌కుడు చందు మొండేటి.. కార్తికేయ‌-2 సూప‌ర్ స‌క్సెస్ అవుతుంద‌ని ధీమా వ్య‌క్తం చేశాడు. ఈ సినిమా విజ‌యం సాధించి.. కార్తికేయ‌-3కి పునాది వేస్తుంద‌ని కూడా అత‌ను వ్యాఖ్యానించాడు.

కార్తికేయ తెలుగు ప్రాంత‌మైన సుబ్ర‌హ్మ‌ణ్య‌పురంలో జ‌రిగింద‌ని.. సీక్వెల్‌కు ఉత్త‌రాదిన ఉన్న ద్వార‌క‌ను నేప‌థ్యంగా తీసుకున్నామ‌ని.. ఈ క‌థ ద్వార‌క‌తో పాటు ప‌లు ప్రాంతాల్లో జ‌రుగుతుంద‌ని.. ఈ చిత్రం త‌మ అంచ‌నాల‌కు త‌గ్గ‌ట్లు విజ‌యం సాధిస్తే.. దీనికి కొన‌సాగింపుగా కార్తికేయ‌-3 క‌చ్చితంగా తీస్తామ‌ని చందు చెప్పాడు. మూడో భాగం కోసం ఐడియాలు ఆలోచిస్తున్నాన‌ని.. ఆ క‌థ అంత‌ర్జాతీయ స్థాయిలో ఉంటుంద‌ని.. హీరో ఇంట‌ర్నేష‌న‌ల్ లెవెల్లో మిస్ట‌రీ ఛేదించే ఆప‌రేష‌న్ మీద వెళ్తాడ‌ని చందు తెలిపాడు.

కార్తికేయ‌-1 చూడని వారికి కూడా కార్తికేయ‌-2 బాగా అర్థ‌మ‌వుతుంద‌ని.. మున్నాబాయ్ ఎంబీబీఎస్ త‌ర్వాత మున్నాబాయ్ ల‌గే ర‌హోలో మాదిరి క్యారెక్ట‌ర్స్, సోల్ మాత్ర‌మే తీసుకుని వేరే క‌థ‌తో చేసిన సినిమా ఇద‌ని చందు తెలిపాడు. త‌న ఫ్యూచ‌ర్ ప్రాజెక్టుల గురించి చందు చెబుతూ.. గీతా ఆర్ట్స్‌లో ఓ సినిమా ఖ‌రారైంద‌ని, అద‌య్యాక నాగార్జున‌తో సినిమా ఉంటుంద‌ని వెల్ల‌డించాడు.