చిరు పాటకు కోహ్లి డ్యాన్స్

‘ఆచార్య’తో బాక్సాఫీస్ దగ్గర పెద్ద షాక్ తిన్నాడు కాబట్టి మెగాస్టార్ చిరంజీవిని కొందరు తక్కువ అంచనా వేస్తుండొచ్చుకానీ.. ఒకప్పుడు ఆయన అలాంటిలాంటి హిట్లు ఇవ్వలేదు. ప్రేక్షకుల మీద మామూలు ఇంపాక్ట్ చూపించలేదు. ముఖ్యంగా 80, 90, 2000 దశకాల్లో చిరు ప్రభావం మామూలుగా ఉండేది కాదు. అప్పటి యువతకు ఆయన ఆరాధ్యుడు. అలాంటి అభిమానుల్లో సెలబ్రెటీలు కూడా ఉన్నారు.

హైదరాబాద్ క్రికెట్లో ఫేమస్ అయిన డీబీ రవితేజ సైతం చిరంజీవికి పెద్ద అభిమానేనట. అతను ఒకప్పుడు అండర్-16 దశలో విరాట్ కోహ్లితో కలిసి రూం షేర్ చేసుకున్నాడట. ఆ టైంలో అతను ఎప్పుడూ టీవీలో మెగాస్టార్ చిరంజీవి పాటలే చూస్తూ ఉండేవాడట. అప్పుడు కోహ్లి సైతం తనతో కలిసి చిరు పాటలకు స్టెప్పులేసేవాడట. చిరు మీద రవితేజ అభిమానం చూసి.. అతణ్ని ‘చిరు’ అనే పిలిచేవాడట. ఈ విషయాన్ని స్వయంగా రవితేజనే ఇప్పుడు వెల్లడించడం విశేషం.

ప్రస్తుతం డీబీ రవితేజ యూకేలో ఉన్నాడు. బహుశా అక్కడ స్థానిక క్రికెట్ లీగ్స్ ఏమైనా ఆడుతున్నాడేమో తెలియదు. అతను తాజాగా విరాట్ కోహ్లిని కలిశాడు. ఆ ఫొటోను సోషల్ మీడియాలో షేర్ చేస్తూ తన అనుభవాన్ని పంచుకున్నాడు. ఈ సందర్భంగా కోహ్లి తనను హాయ్ చిరు ఎలా ఉన్నావ్ అనే పలకరించినట్లు అతను వెల్లడించాడు.

ఈ క్రమంలోనే అండర్-16 రోజులను గుర్తు చేసుకున్నాడు. తాను, కోహ్లి కలిసి చిరు పాటలకు స్టెప్పుడేయడం, చిరు మీద తన అభిమానం చూసి విరాట్ తనను ఆ పేరే పెట్టి.. ఇప్పుడు అలాగే పలకరించడం గురించి వెల్లడించాడు రవితేజ. ఈ పోస్టు ఇప్పుడు సోషల్ మీడియాలో వైరల్ అవుతోంది. చిరు రేంజ్ అది అని, విరాట్ లాంటి ఫేమస్ క్రికెటర్ కూడా తన పాటలకు స్టెప్పులేశాడని.. అదే పేరుతో తన సహచర క్రికెటర్‌ను పిలిచాడని.. ఇలా తెలుగు రాష్ట్రాల అవతల కూడా సెలబ్రెటీల్లో ఫేమస్ అయిన అరుదైన హీరో ఆయన అని మెగా అభిమానులు కొనియాడుతున్నారు.