స్కూలుకి వెళ్తే కదా గర్ల్‌ఫ్రెండ్ ఉండడానికి?

స్టార్ హీరోలకు పెళ్లీడు రాగానే వాళ్ల కంటే అభిమానులు పెళ్లి గురించి ఎక్కువ ఎగ్జైట్ అయిపోతుంటారు. మీడియా వాళ్లు కూడా వాళ్లు దొరికినపుడల్లా పెళ్లి గురించి అడుగుతుంటారు. ఇక సోషల్ మీడియాలో హీరోల వివాహం గురించి జరిగే చర్చ అంతా ఇంతా కాదు. ప్రస్తుతం టాలీవుడ్ మోస్ట్ ఎలిజిబుల్ బ్యాచిలర్స్‌లో ఒకడైన రామ్ పెళ్లి గురించి కూడా ఈ మధ్య ఓ చర్చ జరిగింది.

అతను తన స్కూల్ డేస్‌లో ఇష్టపడ్డ అమ్మాయితో జీవితాన్ని పంచుకోబోతున్నాడని గట్టిగా ప్రచారం జరిగింది. దీని గురించి రామ్ కూడా ట్విట్టర్ ద్వారా స్పందించాడు. ఈ ప్రచారాన్ని ఫన్నీ స్టయిల్లో ఖండించాడు. ఇప్పుడు తన కొత్త చిత్రం ‘ది వారియర్’ ప్రమోషన్ల సందర్భంగా రామ్ మరోసారి ఆ విషయం మీద క్లారిటీ ఇచ్చాడు. స్కూల్ గర్ల్ ఫ్రెండ్ అంటూ తన గురించి ప్రచారం చూసి ఇంట్లో వాళ్లు కూడా తనను అనుమానించారని రామ్ తెలిపాడు. అలాగే స్నేహితులు కూడా తన వైపు అనుమానంగా చూశారన్నాడు.ఏమీ లేకుండా ఇలాంటి వార్తలు ఎందుకు వస్తాయి అని తన స్నేహితులు కొందరు తనను ప్రశ్నించారని.. ఐతే ‘‘నేనసలు స్కూల్‌కి వెళ్తే కదా గర్ల్ ఫ్రెండ్ ఉండడానికి’’ అని వాళ్లను ప్రశ్నిస్తే.. ఆ ప్రశ్న లాజికల్‌గా అనిపించి తనను నమ్మడం మొదలుపెట్టారని రామ్ చెప్పాడు.

అసలు తన గురించి ఈ ప్రచారం ఎలా జరిగిందో తనకు అర్థం కాలేదని రామ్ చెప్పాడు. ఐతే ఇప్పుడిలా అందరూ మాట్లాడుకున్నారు కదా అని హడావుడిగా పెళ్లి చేసుకోనని.. అది జరగాల్సినపుడు జరుగుతుందని రామ్ వ్యాఖ్యానించాడు. ఇక ‘ది వారియర్’ సినిమా గురించి చెబుతూ.. దర్శకుడు లింగుస్వామి కథ చెప్పాక తాను చాలా ఎగ్జైట్ అయి ఆ రోజు సాయంత్రానికే తాను పోలీస్ డ్రెస్ తెప్పించుకుని ఆ పాత్ర కోసం సన్నద్ధం అయినట్లు రామ్ చెప్పాడు. కమర్షియల్ సినిమాల నుంచి ప్రేక్షకులు ఆశించే అన్ని అంశాలూ ఉంటూనే వైవిధ్యం కూడా ఉన్న సినిమా ఇదని, తన కెరీర్లో ఇది బిగ్గెస్ట్ హిట్‌గా నిలుస్తుందని ఆశాభావం వ్యక్తం చేశాడు రామ్.