క్లైమాక్స్ చేరుతున్న విక్రమ్ కథ

కమల్ హాసన్ కెరీర్లోనే బిగ్గెస్ట్ బ్లాక్ బస్టర్ గా నిలిచిన విక్రమ్ థియేట్రికల్ రన్ క్లైమాక్స్ కు చేరుకుంది. ముందుగా చేసుకున్న ఒప్పందం ప్రకారం జూలై 8 నుంచి హాట్ స్టార్ లో ప్రీమియర్ కానున్న సంగతి తెలిసిందే. కేవలం 35 రోజుల వ్యవధిలో ఓటిటిలో మళ్ళీ మళ్ళీ చూసే ఛాన్స్ రాబోతున్నందుకు మూవీ లవర్స్ ఆనందం మాములుగా లేదు. కమల్ ఫ్యాన్స్ మాత్రం కనీసం యాభై రోజుల విండో ఉంటే ఇంకో ఇరవై కోట్లు అదనంగా వసూలు చేసే ఛాన్స్ ఉండేదని వాపోతున్నారు. తెలుగులో ఆల్రెడీ పది రోజుల నుంచే విక్రమ్ నెమ్మదించింది

రెండు భాషల్లో ట్రిపుల్ ప్రాఫిట్స్ ఇచ్చిన విక్రమ్ దెబ్బకు కమల్ మరుగున పడిన ప్రాజెక్టులు కూడా బయటికి వచ్చేలా ఉన్నాయి. ఎప్పుడో పక్కనపెట్టేసిన శభాష్ నాయుడుని రీ స్టార్ట్ చేసే ఆలోచన జరుగుతోంది. ఇరవై ఏళ్ళ క్రితం ఆపేసిన మారుదనాయగం కొనసాగించమని అభిమానులు డిమాండ్ చేస్తున్నారు. వీటికి తోడు ఇండియన్ 2 ఎలాగూ ఉంది. కమల్ మాత్రం విక్రమ్ 2 మీద మనసు పడ్డారట. కానీ దర్శకుడు లోకేష్ కనగరాజ్ విజయ్ కిచ్చిన కమిట్ మెంట్ వల్ల అంత సులభంగా తెరకెక్కకపోవచ్చు.

ఒక్క తమిళ వెర్షన్ నుంచే 400 కోట్లకు పైగా రాబట్టిన విక్రమ్ అక్కడ బాహుబలి 2ని దాటేసి నెంబర్ వన్ స్థానంలో కూర్చుంది. దీని వల్ల రజినీకాంత్ మీద ఒత్తిడి మొదలయ్యింది. తన స్నేహితుడిని జైలర్ తో క్రాస్ చేయాలని ఫ్యాన్స్ కోరుకుంటున్నారు. ఇక హాట్ స్టార్ లో వచ్చాక వ్యూస్ పరంగా కొత్త రికార్డులు నమోదయ్యే అవకాశాలు ఉన్నాయి. ఇప్పటిదాకా ఆ ప్లాట్ ఫార్మ్ లో అఖండ, భీమ్లా నాయక్, బ్రో డాడీ లాంటి కొన్ని సౌత్ సినిమాలే వ్యూస్ లో డామినేట్ చేశాయి. ఇప్పుడు విక్రమ్ వచ్చాక ఇవన్నీ తప్పుకోవడం లాంఛనమే.