చెంపదెబ్బ లాంటి సామ్ సమాధానం

గౌరవప్రదంగా విడాకులు తీసుకుని వ్యక్తిగత జీవితాలు గడుపుతున్న నాగ చైతన్య సమంతాలను గాసిప్ భూతాలు వదలడం లేదు. ఎవరి కెరీర్లో వాళ్ళు బిజీగా ఉన్నప్పటికీ ఏవేవో కథనాలతో ఆధారాలు లేకపోయినా సరే బురదజల్లే బ్యాచులు ఎక్కువైపోతున్నాయి. వీటిని పట్టించుకోకుండా ఎంత సంయమనం పాటిద్దామనుకున్నా సరే అదుపు చేసుకోవడం కష్టమైపోతోంది. అందులోనూ సోషల్ మీడియాలో యాక్టివ్ గా ఉండే సామ్ లాంటి వాళ్ళు ఊరికే తమమీద వచ్చిన కామెంట్లకు సమాధానం చెప్పకుండా ఉండలేరు. ఇప్పుడదే జరిగింది.

చైతు వేరొకరితో ప్రేమలో ఉన్నాడని, గ్లామర్ వేషాలకు దూరంగా కేవలం పరిమితంగా నటించే ఆ అమ్మాయితో డీప్ లవ్ లో పడిపోయాడని, వీటిని సమంతా తరఫున పిఆర్ టీమే ప్రచారం చేయించిందని ఓ వెబ్ సైట్ లో ఏదేదో రాశారు. దీంతో సామ్ కు కోపం వచ్చింది. కాకపోతే ట్విట్టర్ లో దాన్ని రీ ట్వీట్ చేస్తూ అమ్మాయి మీద ఏదైనా పుకారు వస్తే అది నిజమే అనుకునేవాళ్లు, అదే అబ్బాయి మీద వస్తే మాత్రం అవతలి వాళ్ళ మీదకు సులభంగా తోసేస్తారని గట్టి చురక వేసింది. మీ జీవితాలు చూసుకోమని హితవు పలికింది.

నిజానికి సామ్ స్పందించకుండా సైలెంట్ గా ఉంటే ఇది కొన్ని వేల మందితో ఆగిపోయేది. కాని ఇప్పుడు తన అఫీషియల్ హ్యాండిల్ నుంచి రీ ట్వీట్ చేసి తప్పుని ఎత్తి చూపడంతో ఇప్పటిదాకా తెలియని వాళ్లకు కూడా ఉప్పందించినట్టు అయ్యింది. ఇలాంటి వాటిని ఖండించడం అవసరమే కానీ దాని వల్ల కలిగే ప్రయోజనం ఎంత మోతాదులో ఉంటుందో గుర్తించడం అవసరం. డైవోర్స్ అయ్యాక మునుపటి కంటే బిజీగా మారిన సమంతాకు ఇప్పుడు చేతి నిండా ఆఫర్లున్నాయి.