తమిళ స్టార్లు మారరా?

తెలుగు స్టార్లు ఒక్కొక్కరుగా పాన్ ఇండియా స్థాయిలో తమ మార్కెట్‌ను విస్తరిస్తున్నారు. ఇది చూసి తమిళ స్టార్లకు కూడా ఆశ పుడుతోంది. ఒక్కొక్కరుగా బహు భాషా చిత్రాల్లో నటించడం మొదలు పెడుతున్నారు. ముఖ్యంగా అనువాద చిత్రాలతో తప్ప తెలుగులో ఎప్పుడూ సినిమాలు చేయని స్టార్లంతా ఇప్పుడు వరుసగా తెలుగులో డైరెక్ట్ సినిమాలు సెట్ చేస్తుండటం కొత్త పరిణామం.

నిజానికి చాలామంది తమిళ స్టార్లకు ఒకప్పుడు తెలుగులో మంచి మార్కెట్ ఉండేది. కానీ గత కొన్నేళ్లలో ఆ మార్కెట్ అంతా కరిగిపోయింది. తెలుగు స్టార్లతో సమానంగా ఒకప్పుడు ఫాలోయింగ్, మార్కెట్ ఉన్న రజినీకాంత్, కమల్ హాసన్, సూర్య లాంటి బిగ్ స్టార్ల సినిమాలకు ఇప్పుడు ఆ స్థాయిలో ఆదరణ ఉండట్లేదు.

ఇలాంటి టైంలో విజయ్, ధనుష్, శివ కార్తికేయన్ లాంటి తమిళ స్టార్లు తెలుగులో డైరెక్ట్ సినిమాలు చేస్తుండటం విశేషం. ఐతే ఇలా నేరుగా తెలుగులోకి అడుగు పెట్టడానికి ముందు ఇక్కడి ప్రేక్షకులకు చేరువయ్యే అవకాశం వచ్చినపుడు దాన్ని ఎలా వాడుకుంటారన్నది కీలకం.

ఈ మధ్యే విజయ్ సినిమా ‘బీస్ట్’ రిలీజైంది. దానికి ముందు విజయ్ వరుసగా తెలుగులో హిట్లు కొట్టాడు. ఫాలోయింగ్ పెంచుకున్నాడు. ఈ నేపథ్యంలో ‘బీస్ట్’కు మంచి బజ్ కనిపించింది. త్వరలోనే నేరుగా తెలుగు సినిమాతో వస్తున్నపుడు తెలుగు రాష్ట్రాలకు వచ్చి ‘బీస్ట్’ ప్రమోషన్లలో పాల్గొని ఉంటే బాగుండేది. కానీ విజయ్‌ అందుకు ఆసక్తి చూపించలేదు. ఈ విషయంలో తీవ్ర విమర్శలు ఎదుర్కొన్నాడు.

తెలుగు ప్రేక్షకులంటే అంత చిన్నచూపా అన్న కామెంట్లు వినిపించాయి. ఇప్పుడు శివ కార్తికేయన్ సైతం ఇదే చేస్తున్నాడు. అతడి చివరి సినిమా ‘వరుణ్ డాక్టర్’ తెలుగులో సర్ప్రైజ్ హిట్టయింది. శివకు ఇక్కడ ఓ మోస్తరుగా గుర్తింపు లభించింది. దీంతో అతడి కొత్త చిత్రం ‘డాన్’ను తెలుగులో రిలీజ్ చేయాలని నిర్ణయించారు.

కానీ శుక్రవారం సినిమా తెలుగులో రిలీజైన విషయం కూడా జనాలకు తెలియని పరిస్థితి. ఈ సినిమాకు అసలు ప్రమోషన్లవే లేవు. కనీసం పీఆర్వోను కూడా పెట్టుకోలేదు. శివ సహా ఎవ్వరూ ఇటు వైపు చూడలేదు. నిజానికి ఈ చిత్రానికి తమిళంలో మంచి టాక్ వచ్చింది. అక్కడ సినిమా హిట్టే. మరి మంచి సినిమా చేసినపుడు, తర్వాతి చిత్రంతో తెలుగులో అడుగుపెట్టబోతున్న హీరో.. ఇంత నామమాత్రంగా సినిమా రిలీజ్ చేయడం, దాన్ని ప్రమోట్ చేయకపోవడమేంటి?

విజయ్ చేసిన తప్పే శివకార్తికేయన్ కూడా చేయడం చూస్తే ఈ తమిళ స్టార్లు మారరా అన్న సందేహాలు కలుగుతున్నాయి. ఈ విషయంలో తెలుగులో స్టార్లను కొనియాడాల్సిందే. తెలుగు రాష్ట్రాల అవతల తమ సినిమాలను ఎంత బాగా ప్రమోట్ చేస్తారో చూస్తే.. వాళ్లెందుకు పాన్ ఇండియా స్టార్లుగా ఎదుగుతున్నారో అర్థమవుతుంది.