అర్జున్ రెడ్డి రా వెర్ష‌న్.. రెడీ!

అర్జున్ రెడ్డి.. తెలుగు సినిమా చ‌రిత్ర‌లో ఈ సినిమాకో ప్ర‌త్యేక అధ్యాయం కేటాయించాల్సిందే. ఇదొక మోడ‌ర్న్ క్లాసిక్, ట్రెండ్ సెట్ట‌ర్ అన‌డంలో సందేహం లేదు. ఇందులోని బోల్డ్‌నెస్‌ను ఓ వ‌ర్గం ప్రేక్ష‌కులు జీర్ణించుకోలేక‌పోవ‌చ్చు కానీ.. క‌థాక‌థ‌నాలు, న‌రేష‌న్ విష‌యంలో ఈ చిత్రంతో ఒక కొత్త ఒర‌వ‌డికి శ్రీకారం చుట్టాడు కొత్త ద‌ర్శ‌కుడు సందీప్ రెడ్డి వంగ‌. అది ప్రేక్ష‌కుల‌కు విప‌రీతంగా న‌చ్చేసి సెన్సేష‌న‌ల్ హిట్ట‌యిపోయింది అర్జున్ రెడ్డి.

ఈ సినిమాతో విజ‌య్ దేవ‌ర‌కొండ ఓవ‌ర్ నైట్ పెద్ద స్టార్ అయిపోయాడు. ఈ చిత్రంలో విజ‌య్ పెర్ఫామెన్స్, సందీప్ ద‌ర్శ‌క‌త్వ ప్ర‌తిభ గురించి ఎంత చెప్పినా త‌క్కువే. ఈ సినిమాను అనుక‌రిస్తూ త‌ర్వాత ఎన్నో చిత్రాలు వ‌చ్చాయి కానీ.. ఏదీ దాని స్థాయిని అందుకోలేక‌పోయింది. అర్జున్ రెడ్డిని హిందీలో క‌బీర్ సింగ్‌గా రీమేక్ చేస్తే అక్క‌డా సెన్సేష‌న‌ల్ హిట్ట‌యింది.

ఈ ఏడాది ఆగ‌స్టు 25కు అర్జున్ రెడ్డి రిలీజై ఐదేళ్లు పూర్త‌వుతుంది. ఈ సంద‌ర్భంగా అర్జున్ రెడ్డి రా వెర్ష‌న్‌ను రిలీజ్ చేయ‌బోతున్న‌ట్లు ద‌ర్శ‌కుడు సందీప్ రెడ్డి ఒక ఇంట‌ర్వ్యూలో వెల్ల‌డించాడు. ఈ సినిమాను ముందు 4 గంట‌ల 20 నిమిషాల నిడివితో తీశాడు సందీప్. త‌ర్వాత దాన్ని 3 గంట‌ల 45 నిమిషాల‌కు కుదించాడు. కానీ ఈ లెంగ్త్ కూడా చాలా ఎక్కువ అవుతుంద‌ని భావించి చివ‌రికి 3 గంట‌ల ర‌న్ టైంతో రిలీజ్ చేశారు. మామూలుగా ఇప్పుడు సినిమాల నిడివి రెండున్న‌ర గంట‌ల‌కు అటు ఇటు ఉంటోంది. 3 గంట‌ల‌కే లెంగ్త్ ఎక్కువ అంటారు. అలాంటిది 3 గంట‌ల 45 నిమిషాల ర‌న్ టైం అంటే క‌ష్ట‌మే. అందుకే దాన్ని కుదించాల్సి వ‌చ్చింది.

ఐతే సినిమాను 3.45 గంట‌ల నిడివితో రిలీజ్ చేసి ఉంటే ఇంకా పెద్ద హిట్ట‌య్యేద‌ని, అర్జున్ రెడ్డి పాత్ర ఇంకా ఇంపాక్ట్ చూపించేద‌ని, అందుకే ఇప్పుడు ఈ సినిమా రా వెర్ష‌న్‌ను ఐదో వార్షికోత్స‌వ సంద‌ర్భాన రిలీజ్ చేయ‌బోతున్నాన‌ని సందీప్ ప్ర‌క‌టించాడు. అర్జున్ రెడ్డి కాలేజీలో అడుగు పెట్ట‌డానికి ముందు జీవితాన్ని, ఇంకా కొన్ని అద‌న‌పు స‌న్నివేశాల‌ను చూడొచ్చ‌ట ఇందులో. మ‌రి ఏ ఫ్లాట్ ఫాం ద్వారా రా వెర్ష‌న్ రిలీజ‌వుతుందో సందీప్ ఇంకా చెప్ప‌లేదు.