కేజీఎఫ్ హీరో మాస్టర్ ప్లాన్

ఇంకో నాలుగు రోజుల్లో ‘బీస్ట్’ అనే తమిళ అనువాద చిత్రం ప్రేక్షకుల ముందుకు రాబోతోంది. తెలుగులో మార్కెట్ పెంచేసుకోవాలని.. మన హీరోల్లాగే పాన్ ఇండియా స్టార్ అయిపోవాలని విజయ్ ఆశించడం వరకు బాగానే ఉంది కానీ.. కనీసం ఈ చిత్రాన్ని తెలుగులో వచ్చి ప్రమోట్ చేయాలన్న ఆలోచనే విజయ్‌కి రాలేదు.

మిగతా తమిళ స్టార్లందరి క్రేజ్ అంతకంతకూ పడిపోతుంటే.. విజయ్‌కి తెలుగులో నెమ్మదిగా ఫాలోయింగ్ పెరుగుతోంది. ఇలాంటి టైంలో హైదరాబాద్‌కు వచ్చి తెలుగు ప్రేక్షకులను పలకరిస్తే, ప్రేమగా నాలుగు మాటలు మాట్లాడితే, వారిని ఓన్ చేసుకునే ప్రయత్నం చేస్తే విజయ్ సినిమాకు చాలా ప్రయోజనం చేకూరుతుంది. సినిమా బాగుంటే సక్సెస్ రేంజ్ పెరుగుతుంది. కానీ విజయ్ మాత్రం మిన్నకుండిపోయాడు. ఈ సినిమాకే కాదు.. గత చిత్రాలకు కూడా ఇటు వైపు చూడలేదు. ఐతే ఇదే సమయంలో విజయ్‌కు పాఠాలు నేర్పిస్తున్నాడు కన్నడ స్టార్ యశ్.

‘కేజీఎఫ్’ సినిమా తెలుగులో బ్లాక్‌బస్టర్ అయి ‘కేజీఎఫ్-2’కు తెలుగులో ఊహించని క్రేజ్ వచ్చింది. అందుకు తగ్గట్లే బిజినెస్ కూడా భారీగానే జరిగింది. తమ సినిమాకు చేకూరాల్సిన ప్రయోజనం చేకూరింది కదా అని యశ్ ఆగిపోలేదు. తమ సొంత రాష్ట్రంలో కంటే బాగా తెలుగులో ఈ చిత్రాన్ని ప్రమోట్ చేయడానికి ప్రణాళికలు వేసుకున్నాడు. రెండు రోజుల పాటు తెలుగులో ప్రమోషనల్ టూర్ వేస్తున్నాడతను.

తిరుపతి, విశాఖపట్నం, హైదరాబాద్‌ల్లో అతను ప్రమోషనల్ ఈవెంట్లలో పాల్గొనబోతున్నాడు. ఇందుకు సంబంధించి షెడ్యూల్ కూడా రిలీజ్ చేశాడు. ఆదివారమే అతను తిరుపతిలో అడుగు పెట్టాడు కూడా. తిరుమల దర్శనం చేసుకొచ్చి ఇక్కడ ప్రెస్ మీట్ పెడుతున్నాడు. రేపు వైజాగ్, హైదరాబాద్‌ల్లోనూ ఈవెంట్లు జరగనున్నాయి. తన సినిమాకున్న క్రేజ్‌ను మరింత పెంచడానికి యశ్ మాస్టర్ ప్లానే వేస్తున్నాడని చెప్పాలి. ఇలా ప్రేక్షకులను కలుసుకుని వారిని ఓన్ చేసుకుంటే సినిమాలకు జరిగే ప్రయోజనం వేరని వేరే హీరోలు కూడా గుర్తించాలి.