కేజీఎఫ్-2 రిలీజ్ అప్‌డేట్

‘బాహుబలి: ది కంక్లూజన్’ తర్వాత దేశవ్యాప్తంగా ప్రేక్షకులు ఆ స్థాయిలో అమితాసక్తితో ఎదురు చూస్తున్న సీక్వెల్ ‘కేజీఎఫ్: చాప్టర్-2’. రెండేళ్ల కిందట పెద్దగా అంచనాల్లేకుండా పాన్ ఇండియా స్థాయిలో విడుదలై ‘కేజీఎఫ్’ సృష్టించిన సంచలనం అంతా ఇంతా కాదు. హీరోయిజాన్ని పీక్స్‌లో చూపిస్తూ.. ఎలివేషన్లు, మాస్ అనే పదాల్ని రీడిఫైన్ చేస్తూ ప్రశాంత్ నీల్-యశ్ కలిసి చేసిన ప్రయత్నానికి దేశవ్యాప్తంగా వివిధ భాషల ప్రేక్షకులు బ్రహ్మరథం పట్టారు.

ఈ సినిమా రిలీజైన దగ్గర్నుంచి ‘చాప్టర్-2’ కోసం ఉత్కంఠగా ఎదురు చూస్తున్నారు ప్రేక్షకులు. కానీ 2020లోనే రావాల్సిన ఈ చిత్రం కరోనా, ఇతర కారణాల వల్ల వాయిదాల మీద వాయిదాలు పట్టి 2022 వేసవికి షెడ్యూల్ అయింది. కానీ మేకర్స్ ప్రకటించిన ఏప్రిల్ 14న అయినా ఆ చిత్రం వస్తుందా రాదా అన్న సందేహాలు జనాల్లో ఉన్నాయి. పరిస్థితులు అనుకూలిస్తే ఏప్రిల్ 14న ఈ చిత్రాన్ని రిలీజ్ చేస్తామని మేకర్స్ ప్రకటించినా.. అభిమానుల్లో పూర్తి నమ్మకం అయితే లేదు.ఐతే తాజాగా ‘కేజీఎఫ్-2’ నిర్మాతలు దీని రిలీజ్ డేట్‌ను ధ్రువీకరించారు.

తాజాగా ఒక ఆసక్తికర పోస్టర్ రిలీజ్ చేసిన మేకర్స్.. తమ చిత్రం చెప్పినట్లే ఏప్రిల్ 14న రాబోతోందని స్పష్టం చేశారు. కరోనా ప్రభావం తగ్గి పెద్ద సినిమాలు ఒక్కొక్కటిగా బయటికి వచ్చేస్తున్న నేపథ్యంలో ‘కేజీఎఫ్-2’ రిలీజ్ విషయంలో ఇక సందేహాలేమీ పెట్టుకోవాల్సిన పని లేదనే చెప్పొచ్చు. ఏప్రిల్ 14కు షెడ్యూల్ అయిన భారీ బాలీవుడ్ సినిమా ‘లాల్ సింగ్ చద్దా’ కూడా వాయిదా పడిపోవడంతో ‘కేజీఎఫ్-2’ పాన్ ఇండియా రిలీజ్‌కు లైన్ క్లియర్ అయినట్లే. కాకపోతే తమిళ చిత్రం ‘బీస్ట్’తోనే దానికి కొంచెం ఇబ్బంది ఉంది.

ఈ విజయ్ సినిమాపై తమిళంలో భారీ అంచనాలున్నాయి. దాన్ని కూడా పాన్ ఇండియా స్థాయిలో రిలీజ్ చేయాలనుకుంటున్నారు. కాబట్టి ఈ క్లాష్‌తో కొంచెం సమస్య ఉంది. ఐతే ‘కేజీఎఫ్-2’పై ఉన్న అంచనాల దృష్ట్యా ‘బీస్ట్’ మూవీనే రిలీజ్ డేట్ మార్చుకుంటే మంచిదేమో. దాని మేకర్స్ ఆ దిశగా ఆలోచిస్తారా.. లేక సై అంటే సై అంటారా అన్నదే చూడాలి.