చిరంజీవి ‘బాలయ్య ట్వీట్’పై సర్వత్రా ఆసక్తి!

లాక్ డౌన్ కి సంబంధించి మెగా ఫాన్స్ కి ఉన్న ఆనందం ఏమైనా వుంటే అది చిరంజీవి సోషల్ మీడియాలో అడుగు పెట్టడం. ఏదో పేరుకి ట్విట్టర్ లోకి రావడం కాకుండా చిరంజీవి అప్పట్నుంచీ చాలా యాక్టివ్ గా ఉన్నారు. ప్రతి విషయంపై తగు స్పందనతో పాటు తన హాస్య చతురత కూడా పలుమార్లు చూపించారు. అలాగే ఇండస్ట్రీలో ప్రముఖుల పుట్టినరోజున వారి గురించి ప్రత్యేక ట్వీట్స్ వేస్తూ అలరిస్తున్నారు.

ఈ నేపథ్యంలో జూన్ 10న బాలయ్య పుట్టినరోజున చిరు ఏమి ట్వీట్ చేస్తారనేది సర్వత్రా ఆసక్తి రేకెత్తిస్తోంది. ఇటీవల బాలకృష్ణ చేసిన విమర్శల నేపథ్యంలో చిరు వేసే పుట్టినరోజు ట్వీట్ స్పెషల్ గా ఆకర్షిస్తోంది. మరి చిరంజీవి ఆ రోజు బాలయ్యకు జన్మదిన శుభాకాంక్షలు అందిస్తారా లేక మనసు నొప్పించిన నేస్తం పట్ల కినుక వహిస్తారా? చిరంజీవి తత్త్వం తెలిసిన వారయితే ఆయన కచ్చితంగా ట్వీట్ వేస్తారనే భావిస్తున్నారు.