సునీల్ లుక్ ఓకే.. కానీ స్లాంగే?

‘పుష్ప’ సినిమా నుంచి సునీల్ లుక్ రిలీజ్ చేశారు ఆదివారం. ఇది చూసి షాకవ్వని వాళ్లు లేరు. సునీల్ ఇన్నేళ్ల కెరీర్లో ఇంత భయంకరంగా.. ఇంత ఇంటెన్స్ లుక్‌లో కనిపించింది ఎప్పుడూ లేదు. సుకుమార్ సినిమాలో సునీల్‌ను నెగెటివ్ రోల్‌లో చూడటమే ఆశ్చర్యం అంటే.. అతడి లుక్ ఇలా ఉండటం మరింత ఆశ్చర్యం.

ఈ సినిమాతో సునీల్ కెరీర్ ఒక కొత్త మలుపు తిరిగేలా కనిపిస్తోంది. కొన్నేళ్ల పాటు హీరో వేషాలకు పరిమితం కావడం, మాస్ ఇమేజ్ కోసం ప్రయత్నించడంతో సునీల్ కామెడీ ఇమేజ్ అంతా కొట్టుకుపోయింది. హీరో వేషాలు ఆపేసి తిరిగి కామెడీ చేయబోతే అది పండలేదు.

దీని వల్ల సునీల్ కెరీర్ రెంటికీ చెడ్డట్లు తయారైంది. ఇక అప్పుడే సునీల్ నెగెటివ్ రోల్స్ వైపు అడుగులేశాడు. ఐతే ‘డిస్కో రాజా’లో సునీల్ విలనీ చేస్తే అది కాస్తా కామెడీగా తయారైంది. సినిమాకు అది పెద్ద మైనస్‌గా తయారైంది కూడా. దీంతో సునీల్ ఏం చేయాలో పాలుపోని స్థితికి చేరుకున్నాడు.

ఐతే ‘కలర్ ఫొటో’లో మాత్రం సునీల్ విలన్‌గా సక్సెస్ అయ్యాడు. ఆ పాత్రను చక్కగా డిజైన్ చేసి.. సునీల్‌తో విలనీని పండించారు. దీంతో ఇక సునీల్ విలన్ రోల్స్ మరిన్ని చేయడానికి అవసరమైన కాన్ఫిడెన్స్ వచ్చింది. ఈ సమయంలోనే ‘పుష్ప’ సినిమాలో మంగళం శీను అనే పాత్ర చేసే అవకాశం దక్కింది.

సుక్కు సినిమాలో విలన్ రోల్స్ ఎంత ఇంటెన్స్‌గా, ఆసక్తికరంగా ఉంటాయో తెలిసిందే. ఈ సినిమాలో మెయిన్ విలన్ ఫాహద్ ఫాజిల్ అయినప్పటికీ పార్ట్-1లో అతడి స్క్రీన్ టైం తక్కువే. ధనంజయ, సునీల్‌ల పాత్రలకే నిడివి ఎక్కువ. సునీల్ పాత్ర సినిమాలో బాగానే హైలైట్ అవుతుందని.. ఒక రకంగా ఫస్ట్ పార్ట్‌లో ప్రేక్షకులకు ఎక్కువగా విలనీ చూసేది అతడి నుంచే అని సమాచారం. సునీల్ మేకోవర్ కూడా చాలా బాగుండటంతో ఈ పాత్రపై అంచనాలు పెరిగిపోతున్నాయి.

ఐతే అంతా బాగుంది కానీ.. ఏ పాత్ర చేసినా, దాని నేపథ్యంతో సంబంధం లేకుండా తన గోదావరి స్లాంగ్‌తో డామినేట్ చేస్తుంటాడు సునీల్. తనకు తెలియకుండానే గోదారి యాస తీసుకొచ్చేస్తుంటాడు మాటల్లో. అంతగా అతడిలో స్లాంగ్ ఇమిడిపోయింది. అంతగా తన యాసకు అలవాటు పడిపోయిన సునీల్.. రాయలసీమ స్లాంగ్‌‌లో డైలాగులు చెప్పడమంటే అంత ఈజీ కాదు. ముఖ్యంగా ఈ సినిమా నడిచేది చిత్తూరు ప్రాంతంలో. మిగతా సీమ యాసతో పోలిస్తే చిత్తూరు స్లాంగ్ భిన్నంగా ఉంటుంది. దానికి అలవాటు పడటం చాలా చాలా కష్టమే. ఈ విషయంలో అథెంటిసిటీ మిస్ కాకూండా చూసుకోవడం కీలకం. మరి సుక్కు అండ్ టీం సునీల్‌ నుంచి సీమ యాస విషయంలో ఎంత జాగ్రత్త పడుతుందో చూడాలి.