చై-సామ్ విడాకులు.. ఏమిటీ పిచ్చి మాటలు?

కొన్ని నెలలుగా సాగుతున్న ప్రచారాన్ని నిజం చేస్తూ అక్కినేని నాగచైతన్య-సమంత తామిద్దరం విడిపోతున్నట్లు ప్రకటించారు. సుదీర్ఘ చర్చల తర్వాతే తాము విడిపోతున్నట్లు ఈ జంట ప్రకటించింది. ఎంతో ఆలోచించాకే వాళ్లీ నిర్ణయం తీసుకున్నారన్నది స్పష్టం. ఈ విషయాన్ని అభిమానులు జీర్ణించుకోవడం కష్టమవుతున్నప్పటికీ.. దీని వల్ల అందరికంటే ఎక్కువగా ప్రభావితం అయ్యేది వాళ్లిద్దరే కాబట్టి.. వారి నిర్ణయాన్ని తప్పుబట్టలేం.

ఈ సంగతలా వదిలేస్తే ఇప్పుడందరి దృష్టీ వీరిలా విడిపోవడానికి దారి తీసిన కారణాలేంటన్న దానిపై పడింది. ఈ విషయంలో ఎవరికి ఇష్టం వచ్చినట్లు వాళ్లు కారణాలు సృష్టించేస్తున్నారు. వాటిని సోషల్ మీడియాలో తెగ ప్రచారం చేసేస్తున్నారు. చైతూ-సామ్ విడిపోవడానికి ‘ఫ్యామిలీ మ్యాన్-2’ వెబ్ సిరీస్‌ కారణమని బలంగా నమ్ముతున్న వాళ్లు చాలామందే కనిపిస్తుండటం గమనార్హం.

‘ఫ్యామిలీ మ్యాన్-2’లో సమంత ఎంత బోల్డ్‌గా నటించిందో తెలిసిందే. అందులోని కొన్ని సన్నివేశాలు అక్కినేని అభిమానులకు ఏమాత్రం రుచించలేదు. ఈ విషయంలో చైతూను సోషల్ మీడియా వేదికగా చాలామంది ప్రశ్నించారు. సమంతను తిట్టిపోశారు కూడా. ఆ సిరీస్‌లో అలా నటించినందుకే చైతూ హర్టయ్యాడని, దీనిపై గొడవ జరిగి ఇద్దరూ విడిపోయే వరకు వచ్చిందని తీర్మానాలు చేసేస్తున్నారు. వీరి విడాకులకు ‘ఫ్యామిలీ మ్యాన్-2’ కారణమంటూ పెద్ద ఎత్తున పోస్టులు కనిపిస్తున్నాయి.

ఐతే తరాల నుంచి సినిమాల్లో ఉన్న అక్కినేని కుటుంబంలోని వాళ్లు.. పెళ్లి తర్వాత నటన మానేయాలని కానీ, ఫలానా తరహా పాత్రల్లోనే కనిపించాలని సమంతకు షరతులు పెట్టి ఉంటారని ఎలా అనుకుంటాం? పెళ్లి తర్వాత సమంత కొన్ని సినిమాల్లో సెక్సీగా కనిపించింది, హాట్ హాట్ ఫొటో షూట్లు చేసింది. సమంత హాట్‌గా కనిపించిన వెకేషన్ ఫొటోల్లో చైతూ కూడా ఉండటం గమనించవచ్చు.

అప్పుడు లేని అభ్యంతరం ఇప్పుడు వచ్చి ఉంటుందా? తన తప్పులు సహా అన్నీ తెలిశాకే చైతూ తనను పెళ్లి చేసుకున్నాడని.. తనకు అతను ఎలాంటి షరతులూ పెట్టడని సమంత గతంలో ఒక ఇంటర్వ్యూలో చెప్పడం గమనార్హం. దీన్ని బట్టి సినిమాలో, వెబ్ సిరీస్‌లో, హాట్ ఫొటో షూట్లో వీరి విడాకులకు దారి తీశాయని అనుకోవడం మూర్ఖత్వం. అలాగే బిడ్డను కనడానికి సమంత ఒప్పుకోలేదని.. తన భార్య నుంచి విడాకులు తీసుకున్న ఆమిర్ ఖాన్ ‘లాల్ సింగ్ చద్దా’ షూటింగ్ టైంలో చైతూను ప్రభావితం చేసి సమంత నుంచి విడిపోయేలా చేశాడని.. ఇలాంటి పిచ్చి కారణాలు వెతకడం కూడా మూర్ఖత్వం తప్ప మరొకటి కాదు. దీనికి దారి తీసిన కారణం పూర్తిగా వ్యక్తిగత విషయం అయ్యుంటుంది. ఆ కారణం ఏంటన్నది ఎప్పటికీ బయటికి రాకపోవచ్చు కూడా.