డేగ‌ల బాబ్జీగా ‘కొత్త’ హీరో

టాలీవుడ్లోకి ఒక కొత్త హీరో వ‌స్తున్నాడు. ఆ హీరో పేరు బండ్ల గ‌ణేష్‌. 90వ ద‌శ‌కం నుంచే సినిమాల్లో న‌టిస్తున్న‌ప్ప‌టికీ గ‌ణేష్ ఇప్ప‌టిదాకా స‌హాయ, కామెడీ పాత్ర‌లే చేస్తూ వ‌చ్చాడు. హీరో అవ‌తారం ఎత్త‌లేదు. న‌టుడిగా సినిమాలే ఆపేసి పూర్తి స్థాయిలో నిర్మాత అవ‌తారం ఎత్తిన అత‌ను.. ఈ మ‌ధ్య‌నే స‌రిలేరు నీకెవ్వ‌రు సినిమాతో కామెడీ పాత్ర‌తో రీఎంట్రీ ఇచ్చాడు.

మ‌ళ్లీ గ్యాప్ తీసుకుని ఇప్పుడు ఏకంగా హీరో అయిపోయాడు. ఈ మ‌ధ్య‌నే ఆ సినిమా ప‌ట్టాలెక్కిన సంగ‌తి తెలిసిందే. కేవ‌లం ఒకే పాత్ర ఉండే ఈ సినిమా శ‌ర‌వేగంగా షూటింగ్ జ‌రుపుకుంటోంది. ఇంత‌కుముందే ఆన్ లొకేష‌న్ పిక్ రిలీజ్ చేసిన బండ్ల గ‌ణేష్‌.. ఇప్పుడు సినిమా టైటిల్ రివీల్ చేశాడు. ఈ చిత్రానికి డేగ‌ల బాబ్జీ అనే పేరు పెట్టారు.

బండ్ల గ‌ణేష్ క‌న్ను.. దానిపై కుట్లు క‌నిపిస్తున్న‌ట్లుగా ఒక వ‌యొలెంట్ ప్రి లుక్‌తో టైటిల్ రివీల్ చేశారు. ద‌ర్శ‌కుడు హ‌రీష్ శంక‌ర్ ఈ టైటిల్ లుక్‌ను లాంచ్ చేశాడు. డేగ‌ల బాబ్జీ అనే పేరు.. ప్రి లుక్ చూస్తే సినిమా కొంచెం వ‌యొలెంట్‌గా ఉంటుంద‌నిపిస్తోంది. ఈ చిత్రం త‌మిళంలో విజ‌య‌వంత‌మైన ఒత్త సెరుప్పు సైజ్ 7 ఆధారంగా తెర‌కెక్కుతోంది. త‌మిళంలో ప్ర‌ముఖ న‌టుడు, ద‌ర్శ‌కుడు పార్తీబ‌న్ త‌నే లీడ్ రోల్ చేస్తూ స్వీయ ద‌ర్వ‌క‌త్వం, నిర్మాణంలో తెర‌కెక్కించిన చిత్ర‌మిది. ఈ సినిమాలో కేవ‌లం ఒక్క పాత్రే ఉంటుంది.

త‌మిళంలో మంచి ప్ర‌యోగంగా పేరు తెచ్చుకుని క‌మ‌ర్షియ‌ల్‌గానూ స‌క్సెస్ అయిన ఈ సినిమాను హిందీలో అమితాబ్ బ‌చ్చ‌న్ హీరోగా రీమేక్ చేస్తుండ‌టం విశేషం. తెలుగులో బండ్ల హీరోగా వెంక‌ట్ చంద్ర అనే కొత్త ద‌ర్శ‌కుడు ఈ చిత్రాన్ని రూపొందిస్తున్నాడు. స్వాతి చంద్ర‌, రిషి అగ‌స్త్య నిర్మాత‌లు. త్వ‌ర‌లోనే షూటింగ్ పూర్తి చేసి ఈ ఏడాదే ఈ చిత్రాన్ని ప్రేక్ష‌కుల ముందుకు తేవాల‌ని చూస్తున్నారు.