బోయపాటితో సూర్య!

కోలీవుడ్ స్టార్ హీరో సూర్యకి తెలుగులో మంచి క్రేజ్ ఉంది. ఆయన నటించే సినిమాలను తెలుగులో డబ్ చేసి రిలీజ్ చేస్తుంటారు. చాలా కాలంగా సూర్య తెలుగులో ఓ స్ట్రెయిట్ సినిమా చేయాలనుకుంటున్నారు. కానీ సరైన కథలు దొరకకపోవడంతో ఆయన తెలుగు డెబ్యూ ఆలస్యమవుతూ వస్తుంది. ఆయన తమ్ముడు కార్తీ మాత్రం తెలుగు సినిమాల్లో నటించారు. దీంతో సూర్య కూడా తన తెలుగు సినిమా ప్లాన్స్ ను ముందుకు జరిపినట్లు తెలుస్తోంది. ఈ క్రమంలో కొందరు దర్శకులు చెప్పే కథలను వింటున్నారు.

దర్శకుడు బోయపాటి శ్రీను ఇటీవల సూర్యను కలిసి కథ వినిపించారని సమాచారం. లాక్ డౌన్ సమయంలో రెండు కథలను సిద్ధం చేసుకున్న బోయపాటి అందులో ఒకటి అల్లు అర్జున్ కి వినిపించగా.. మరొకటి సూర్యకి వినిపించినట్లు తెలుస్తోంది. సూర్యకి కథ నచ్చడంతో ఆయన సినిమా చేయడానికి ఆసక్తి చూపుతున్నారట. ఈ సినిమాను దిల్ రాజు నిర్మించబోతున్నట్లు సమాచారం. తమిళ నటుడు విజయ్ ని తెలుగు తెరకు పరిచయం చేయనున్న దిల్ రాజే ఇప్పుడు సూర్యను కూడా తెలుగులోకి తీసుకువస్తుండడం విశేషం.

ప్రస్తుతం బోయపాటి ‘అఖండ’ సినిమాను పూర్తి చేసే పనిలో పడ్డారు. అది పూర్తయిన తరువాత బన్నీతో సినిమా చేయాలనేది ప్లాన్. గీతాఆర్ట్స్ లో ఈ సినిమా తెరకెక్కుతుంది. అయితే బన్నీ కాల్షీట్స్ ను బట్టి డిసైడ్ అవుతారు. ఈ సినిమా విషయంలో ఆలస్యం జరిగితే సూర్య సినిమాను పట్టాలెక్కించాలని అనుకుంటున్నారు బోయపాటి. మొత్తానికి ఇన్నేళ్ల తరువాత తెలుగులో సూర్య సినిమా చేస్తుండడం విశేషం.