ఆర్మీ ఆఫీసర్ గా నాగచైతన్య!

శేఖర్ కమ్ముల దర్శకత్వంలో ‘లవ్ స్టోరీ’ సినిమాను పూర్తి చేసిన నాగచైతన్య ప్రస్తుతం విక్రమ్ కుమార్ తో కలిసి ‘థాంక్యూ’ సినిమాకి వర్క్ చేస్తున్నారు. రీసెంట్ గా ఈ సినిమాకి సంబంధించిన లాంగ్ షెడ్యూల్ ను పూర్తి చేశారు. రొమాంటిక్ డ్రామాగా తెరకెక్కుతోన్న ఈ సినిమా షూటింగ్ చివరి దశలో ఉంది. దీంతో చైతు తన తదుపరి సినిమాల కోసం ప్లాన్ చేసుకుంటున్నారు. తెలుగులో ఓ కొత్త సినిమాను ప్రారంభించడానికి ముందు చైతు బాలీవుడ్ సినిమా చేయబోతున్నాడు.

అమీర్ ఖాన్ ప్రధాన పాత్రలో ‘లాల్ సింగ్ చద్దా’ సినిమా తెరకెక్కుతోన్న సంగతి తెలిసిందే. అద్వైత్ చందన్ డైరెక్ట్ చేస్తోన్న ఈ సినిమా హాలీవుడ్ ‘ఫారెస్ట్ గంప్’కు రీమేక్ అని తెలుస్తోంది. ఈ సినిమాలో కీలక పాత్ర కోసం ముందుగా విజయ్ సేతుపతిని సంప్రదించారు. మొదట ఆయన అంగీకరించినప్పటికీ ఆఖరి నిమిషంలో డేట్స్ ఇష్యూ రావడంతో సినిమా నుండి తప్పుకున్నారు. దీంతో విజయ్ కి బదులుగా నాగచైతన్యను తీసుకున్నారు.

హాలీవుడ్ ‘ఫారెస్ట్ గంప్’ సినిమాలో మైకేల్టి విలియంసన్ పోషించిన ‘బుబ్బా’ అనే పాత్ర కోసం చైతుని తీసుకున్నట్లు తెలుస్తోంది. కథ ప్రకారం సినిమాలో చైతు ఆర్మీ ఆఫీసర్ గా కనిపించబోతున్నారు. ఆర్మీ మ్యాన్ గా కనిపించడానికి చైతు తన లుక్ ని మార్చుకోబోతున్నారు. కాశ్మీర్ లోని కార్గిల్ లో లాంగ్ షెడ్యూల్ ను ప్లాన్ చేస్తున్నారు. దాదాపు 45 రోజుల పాటు షూటింగ్ జరగనుంది. ఈ షెడ్యూల్ లో చైతుపై కీలక ఘట్టాలను చిత్రీకరించనున్నారు. కరోనా ఉదృతి తగ్గగానే షూటింగ్ ను మొదలుపెడతారు.