ఫ‌ల‌క్‌నుమా దాస్-2 ప‌క్కా

వెళ్లిపోమాకే అనే చిన్న సినిమాతో హీరోగా ప‌రిచ‌యం అయ్యాడు విశ్వ‌క్‌సేన్. అందులో చాలా డ‌ల్లుగా ఉండే పాత్ర చేసిన‌ విశ్వ‌క్ పెద్ద‌గా జ‌నాల దృష్టిలో ప‌డ‌లేదు. ఆ సినిమా కూడా అనుకున్నంత‌గా జ‌నాల‌కు రీచ్ కాలేదు. ఇక త‌రుణ్ భాస్క‌ర్ ద‌ర్శ‌క‌త్వంలో చేసిన ఈ న‌గ‌రానికి ఏమైంది ప‌ర్వాలేద‌నిపించింది త‌ప్ప‌.. ఆ సినిమా కూడా అంచ‌నాల‌ను అందుకోలేక‌పోవ‌డంతో విశ్వ‌క్ గురించి పెద్ద‌గా చ‌ర్చ లేక‌పోయింది. కానీ త‌నే హీరోగా న‌టిస్తూ స్వీయ ద‌ర్శ‌క‌త్వం, నిర్మాణంలో రూపొందించిన ఫ‌ల‌క్‌నుమా దాస్‌తో అత‌డి పేరు మార్మోగింది.

ఈ సినిమా కూడా అంచ‌నాల‌ను అందుకోవ‌డంలో విఫ‌ల‌మైన‌ప్ప‌టికీ.. రిలీజ్ ముంగిట దీనికి మంచి హైపే వ‌చ్చింది. మ‌ల‌యాళం బ్లాక్‌బ‌స్ట‌ర్ అంగామ‌లై డైరీస్‌కు రీమేక్‌గా తెర‌కెక్కిన ఈ చిత్రాన్ని విశ్వ‌క్ ఉన్నంత‌లో బాగానే డీల్ చేశాడు. దాస్ పాత్ర‌లో అత‌డి దూకుడు యూత్‌కు బాగా న‌చ్చింది. ఆ సినిమాతోనే విశ్వ‌క్ మంచి ఫాలోయింగ్ సంపాదించుకున్నాడు.

హిట్ మూవీతో మంచి హిట్ కొట్టి.. ప్ర‌స్తుతం పాగ‌ల్ స‌హా రెండు మూడు సినిమాల్లో న‌టిస్తున్న విశ్వ‌క్‌.. త్వ‌ర‌లోనే ఫ‌ల‌క్‌నుమా దాస్‌కు సీక్వెల్ చేయ‌బోతుండ‌టం విశేషం. ఈ సినిమా వ‌చ్చిన‌పుడే విశ్వ‌క్ దీనికి సీక్వెల్ ఉంటుంద‌న్నాడు కానీ.. ఆ త‌ర్వాత దాని ఊసే లేదు. కేవ‌లం ప‌బ్లిసిటీ కోసం చెప్పిన మాట‌లాగే అనిపించింద‌ది. కానీ ఫ‌ల‌క్‌నుమా దాస్ రిలీజైన మూడేళ్లు కావ‌స్తుండ‌గా ఇప్పుడు అత‌ను సీక్వెల్ గురించి సంకేతాలు ఇవ్వ‌డం విశేషం.

ఈ సినిమా ప్రారంభోత్స‌వం జ‌రిపి మూడేళ్లు అయిన సంద‌ర్భంగా ముహూర్త కార్య‌క్ర‌మానికి సంబంధించిన ఫొటోను ఇన్‌స్టాగ్రామ్‌లో షేర్ చేసిన విశ్వ‌క్.. ఫ‌ల‌క్‌నుమా దాస్-2 ఉంటుంద‌ని, త్వ‌ర‌లోనే ఆ చిత్రం మొద‌ల‌వుతుంద‌ని ప్ర‌క‌టించాడు. ఐతే ఫ‌ల‌క్‌నుమా దాస్ ఒరిజిన‌ల్ అంగామలై డైరీస్‌కు మ‌ల‌యాళంలో సీక్వెల్ ఏమీ రాలేదు. అంటే ఈసారి సొంతంగా క‌థ అల్లుకుని విశ్వ‌క్ రంగంలోకి దిగుతాడన్న‌మాట‌.