బిగ్ బాస్ షోలో భూమిక.. స్పందించిన నటి!

ఒకప్పుడు చిరంజీవి, పవన్ కళ్యాణ్, మహేష్ బాబు, ఎన్టీఆర్ ఇలా చాలా మంది అగ్ర హీరోల సరసన నటించి టాప్ హీరోయిన్ గా దూసుకుపోయింది భూమిక. ఆ తరువాత హీరోయిన్ గా అవకాశాలు తగ్గడంతో వదిన, అక్క క్యారెక్టర్లు చేస్తూ బిజీగా అయింది. బాలీవుడ్ లో కూడా ఈ తరహా పాత్రలు పోషిస్తూ మెప్పిస్తుంది. అయితే గత కొన్ని రోజులుగా ఆమె బిగ్ బాస్ షోలో కనిపించబోతుందంటూ మీడియాలో వార్తలు వస్తున్నాయి. సల్మాన్ ఖాన్ హోస్ట్ చేస్తోన్న బిగ్ బాస్ సీజన్ 15 కోసం కంటెస్టెంట్ గా భూమికను సంప్రదిస్తున్నట్లు వార్తలు వైరల్ అయ్యాయి.

తాజాగా వీటిపై స్పందించింది భూమిక. ఇదొక ఫేక్ న్యూస్ అని క్లారిటీ ఇచ్చింది. తనకు బిగ్ బాస్ ఆఫర్ రాలేదని చెప్పింది. గతంలో సీజన్ 1, సీజన్ 2, సీజన్ 3 సమయంలో తనను కంటెస్టెంట్ గా సంప్రదించారని.. ఆ తరువాత కూడా అడిగారని కానీ ప్రతిసారీ తిరస్కరిస్తూ వచ్చానని స్పష్టం చేసింది. అయితే ఈసారి తనను ఎవరూ సంప్రదించలేదని.. ఒకవేళ ఆఫర్ చేసినా.. తను మాత్రం ఒప్పుకోనని తెగేసి చెప్పింది. తను పబ్లిక్ పర్సనాలిటీ అయినప్పటికీ.. తన లైఫ్ ప్రైవేట్ అని.. 24 గంటలు తనపై కెమెరాలు ఉండడం ఇష్టం లేదని చెప్పుకొచ్చింది.

బిగ్ బాస్ షో గురించి అందరికీ తెలిసిన విషయమే. హౌస్ లో జరిగే ప్రతి సంఘటన, సంభాషణలు కెమెరాలో రికార్డ్ అవుతూనే ఉంటాయి. పైగా ఈ మధ్యకాలంలో హిందీ బిగ్ బాస్ షోలో గొడవలు, రొమాన్స్ డోస్ బాగా ఎక్కువైంది. సౌత్ బిగ్ బాస్ షోతో పోలిస్తే హిందీ షోలో వ్యవహారాలు కాస్త ఘాటుగా మారాయి. అందుకే చాలా మంది తారలు ఈ షోలోకి పార్టిసిపేట్ చేయడానికి ఆలోచిస్తున్నారు. ఇక భూమికకు తన వ్యక్తిగత విషయాలను బయటపెట్టడం నచ్చదు. అందుకే ఈ షోని రిజెక్ట్ చేస్తూ వచ్చింది.