‘కర్ణన్’ రీమేక్ లో రావు రమేష్..?

ఈ మధ్యకాలంలో టాలీవుడ్ లో రీమేక్ ల పరంపర కొనసాగుతోంది. మెగాస్టార్ చిరంజీవి, పవర్ స్టార్ పవన్ కళ్యాణ్ లాంటి స్టార్ హీరోలు కూడా రీమేక్ కథల్లో నటించడానికి ఆసక్తి చూపిస్తున్నారు. ఇతర భాషల్లో సక్సెస్ అయిన కథలను తీసుకొని వాటిని తెలుగు నేటివిటీకి తగ్గట్లుగా మార్పులు చేసి ఇక్కడ రిలీజ్ చేస్తున్నారు. ఈ క్రమంలో చాలా మంది హీరోలు సక్సెస్ లు కూడా అందుకున్నారు. ఇప్పుడు కుర్ర హీరో బెల్లంకొండ శ్రీనివాస్ కూడా ఓ రీమేక్ కథలో నటించడానికి సిద్ధమవుతున్నారు.

కోలీవుడ్ లో ధనుష్ హీరోగా తెరకెక్కిన ‘కర్ణన్’ సినిమా అక్కడ బ్లాక్ బస్టర్ హిట్ అయింది. ఈ సినిమా రీమేక్ రైట్స్ బెల్లంకొండ సురేష్ తీసుకున్న సంగతి తెలిసిందే. బెల్లంకొండ శ్రీనివాస్ హీరోగా శ్రీకాంత్ అడ్డాల దర్శకత్వంలో ఈ సినిమా తెరకెక్కనుందని సమాచారం. అయితే ఈ సినిమాలో కీలక పాత్ర కోసం ప్రముఖ నటుడు రావు రమేష్ ను సంప్రదించినట్లు తెలుస్తోంది. తమిళంలో ధనుష్ కి తాత వరసయ్యే పాత్రలో మలయాళ నటుడు లాల్ కనిపించారు. ఈ సినిమాలో లాల్ పాత్రకు మంచి ప్రాముఖ్యత ఉంటుంది.

హీరోకు అండగా నిలబడి, మార్గనిర్దేశనం చేసే ముసలి స్నేహితుడిగా లాల్ పాత్ర ప్రేక్షకులను ఆకట్టుకుంటుంది. ఈ పాత్ర కోసమే రావు రమేష్ ని సంప్రదించారట. అయితే ఈ విషయంలో ఆయన ఇంకా ఎలాంటి నిర్ణయం తీసుకోలేదని తెలుస్తోంది. వైవిధ్యమైన పాత్రల్లో నటించడానికి ముందుండే రావు రమేష్ ‘కర్ణన్’ రీమేక్ లో నటిస్తే సినిమాకి మరింత మైలేజ్ వస్తుందని మేకర్లు భావిస్తున్నారు. మరి ఈ పాత్రకు రావు రమేష్ ఓకే చెప్తారో లేదో చూడాలి!