రాజమౌళి కాన్ఫిడెన్స్ ఏంటి?

ఇప్పటికే రెండుసార్లు వాయిదా పడింది ‘ఆర్ఆర్ఆర్’ చిత్రం. మరోసారి ఈ సినిమాను వాయిదా వేయడం అనివార్యం అనే అనుకుంటున్నారంతా. చివరగా ప్రకటించిన రిలీజ్ డేట్ అక్టోబరు 13కు ఇంకో ఐదు నెల సమయం కూడా లేదు. ఇప్పటికీ ఈ సినిమా చిత్రీకరణ పూర్తి కాలేదు. కనీసం ఇంకో నెల రోజులైనా షూటింగ్ చేయాల్సి ఉందంటున్నారు. బహు భాషల్లో రిలీజ్ చేయాల్సిన ఈ చిత్రానికి పోస్ట్ ప్రొడక్షన్ కోసం చాలా సమయమే వెచ్చించాల్సి ఉంటుంది. రాజమౌళి గత సినిమా ‘బాహుబలి’తో పోలిస్తే ఇందులో విజువల్ ఎఫెక్ట్స్ పని తక్కువే కావచ్చు కానీ.. మరీ తేలిగ్గా, తక్కువ రోజుల్లో అయిపోయేదైతే కాదు. కాబట్టి ఈ చిత్రం కచ్చితంగా మరోసారి వాయిదా పడటం ఖాయమని.. 2021లో ఈ సినిమా వచ్చే అవకాశమే లేదని అంతా ఒక నిర్ణయానికి వచ్చేశారు.

కానీ ఈ అంచనాకు భిన్నంగా ఇటీవల ఓ ఇంటర్నేషనల్ మీడియా సంస్థకు ఇచ్చిన ఇంటర్వ్యూలో అక్టోబరు 13నే తమ చిత్రాన్ని విడుదల చేసే అవకాశాలున్నట్లు జూనియర్ ఎన్టీఆర్ వ్యాఖ్యానించాడు. తారక్ ఏదో మాట వరసకు ఈ వ్యాఖ్య చేశాడేమో అనుకుంటే.. తాజాగా రిలీజ్ చేసిన కొమరం భీమ్ పోస్టర్లో అక్టోబరు 13న విడుదల అంటూ ప్రకటించడంతో అందరూ అలెర్ట్ అయిపోయారు.

‘ఆర్ఆర్ఆర్’ అనుకున్న సమయానికి రాదన్న ఉద్దేశంతో దసరా సీజన్ మీద కర్చీఫ్ వేయడానికి వేరే చిత్రాల నిర్మాతలు రెడీ అవుతున్న తరుణంలో ఈ పోస్టర్ ఒకింత కలకలం రేపిందనే చెప్పాలి. ‘ఆర్ఆర్ఆర్’ వచ్చే సంక్రాంతికో లేదంటే వేసవివో వస్తుందన్న ఉద్దేశంతో అందుకు తగ్గట్లు కూడా ప్రణాళికలు మార్చుకునే ప్రయత్నాలూ జరుగుతున్నాయి. ఇలాంటి తరుణంలో అక్టోబరు 13 విడుదలకు ‘ఆర్ఆర్ఆర్’ టీం కట్టుబడి ఉందన్న వార్త చాలామందికి జీర్ణం కావడం లేదు.

ఐతే వాస్తవికమైన అంచనాతోనే ఇలా పోస్టర్ మీద డేట్ వేశారా.. లేక మళ్లీ డేట్ మార్చేశారనే చర్చ ఇప్పటి నుంచే వద్దన్న ఉద్దేశంతో అలా మొక్కుబడిగా డేట్ వేశారా అన్న చర్చ నడుస్తోంది. ఐతే గత ఏడాది, ఇప్పుడు దొరికిన ఖాళీలో ఇప్పటిదాకా చిత్రీకరించిన సన్నివేశాలకు సంబంధించి ఎడిటింగ్, డబ్బింగ్ చాలా వరకు పూర్తి చేశారని.. విజువల్ ఎఫెక్ట్స్ పనులు కూడా సమాంతరంగా అవుతున్నాయని.. మిగతా సన్నివేశాలు, ఇతర పోస్ట్ ప్రొడక్షన్ పనుల విషయంలోనూ ఒక స్పష్టత ఉండటంతో అక్టోబరు 13న సినిమాను రిలీజ్ చేయడానికి ఎందుకు ప్రయత్నించకూడదన్న ఉద్దేశంతోనే చిత్ర బృందం ఉందని.. ఈ దిశగా ట్రై చేసి సాధ్యం కాని పక్షంలో తర్వాత డేట్ మార్చుకుందామనే ఉద్దేశంతోన రాజమౌళి అండ్ కో ఉందని చిత్ర వర్గాల సమాచారం.