తెలుగ‌మ్మాయిపై త‌మిళంలో ప్ర‌శంస‌ల జ‌ల్లు

తెలుగులో అయితే ర‌క్షిత‌.. త‌మిళంలో అయితే ఆనంది.. ఈ అమ్మాయి సినీ ప్ర‌స్థానం చాలా చిత్రంగా సాగింది. తెలుగులో ఈ రోజుల్లో, బ‌స్ స్టాప్ లాంటి చిన్న సినిమాల్లో సైడ్ క్యారెక్ట‌ర్లు చేసిన ఈ తెలుగ‌మ్మాయికి ఇక్క‌డ పెద్ద‌గా గుర్తింపు రాలేదు. కానీ త‌మిళంలో క‌య‌ల్ అనే సినిమాతో క‌థానాయిక‌గా అరంగేట్రం చేసిన ఆమెకు అక్క‌డ మంచి పేరొచ్చింది.

అక్క‌డ అంద‌రూ ఆమెను ఆనందిగా పిలుస్తారు. ఆ పేరుతో బాగానే పాపులారిటీ సంపాదించింది. మంచి మంచి సినిమాలు చేసి క‌థానాయిక‌గా మంచి స్థాయిని అందుకుంది. ఏదో ఒక ప్ర‌త్యేక‌త ఉన్న పాత్ర‌లే ఎంచుకుంటూ సినిమా సినిమాకూ రేంజ్ పెంచుకుంటూ వెళ్తున్న ఆనంది.. కెరీర్లో తొలిసారి ఓ లేడీ ఓరియెంటెడ్ మూవీ చేసింది. ఆ సినిమా పేరు.. క‌మ‌లి ఫ్ర‌మ్ న‌డుక్క‌వేరి. రాజ‌శేఖ‌ర్ దురైస్వామి అనే కొత్త ద‌ర్శ‌కుడు రూపొందించిన ఈ చిత్రం ఋ శుక్ర‌వార‌మే ప్రేక్ష‌కుల ముందుకొచ్చింది.

ఈ ఏడాది ఇప్ప‌టిదాకా త‌మిళంలో వ‌చ్చిన చిత్రాల్లో ఇదే ది బెస్ట్ అంటున్నారు క్రిటిక్స్. ఇందులో ఆనంది పెర్ఫామెన్స్ గురించి అంద‌రూ గొప్ప‌గా మాట్లాడుతున్నారు. ఆమెకిది కెరీర్ బెస్ట్ ఫిలిం అని ఘంటాప‌థంగా చెబుతున్నారు. ఓ క్రిటిక్ అయితే ఆనంది కెరీర్‌కు ఈ సినిమా ఒక్క‌టి చాలు అంటూ ట్వీట్ వేశాడు. ఇదొక ఉదాత్త‌మైన క‌థాంశంతో తెర‌కెక్కిన సినిమా.

ఒక మారుమూల గ్రామానికి చెందిన అమ్మాయి ఎన్నో క‌ష్టాల‌ను, అడ్డంకుల‌ను అధిగ‌మించి ఐఐటీలో చ‌ద‌వాల‌న్న త‌న కోరిక‌ను ఎలా నెర‌వేర్చుకుంద‌నే క‌థాంశంతో ఈ సినిమా తెర‌కెక్కింది. విద్యా వ్య‌వ‌స్థ‌లోని లోపాల‌ను ఎత్తి చూపుతూ.. ఆలోచ‌న రేకెత్తించేలా, ఎంతో హృద్యంగా ఈ సినిమా తీశార‌ని అంద‌రూ మెచ్చుకుంటున్నారు. రివ్యూలు బాగున్నాయి. క‌లెక్ష‌న్ల‌కూ ఢోకా లేదు. మాస్ సినిమా చ‌క్ర‌కు దీటుగా ఈ సినిమా నిలుస్తున్న ఈ చిత్రం ఆనందికి పెద్ద బ్రేక్ అయ్యేలా క‌నిపిస్తోంది.