అఖండ-3 నిజంగా సాధ్యమేనా?

నందమూరి బాలకృష్ణ, బోయపాటి శ్రీను కాంబినేషన్‌కు ఉన్న క్రేజ్ గురించి కొత్తగా చెప్పాల్సిన పని లేదు. బాలయ్య చాలా ఏళ్ల పాటు వరుస డిజాస్టర్లతో సతమతం అవుతున్న సమయంలో ‘సింహా’తో ఆయనకు మరపురాని విజయాన్నిచ్చిన ఘనత బోయపాటిదే. ఆ తర్వాత కూడా బాలయ్య కెరీర్ స్ట్రగుల్లో ఉన్న సమయాల్లోనే ‘లెజెండ్’, ‘అఖండ’ రూపంలో బ్లాక్ బస్టర్లు ఇచ్చాడు. కానీ వీరి కలయికలో వచ్చిన నాలుగో సినిమా ‘అఖండ-2’ మాత్రం అంచనాలను అందుకోలేకపోయింది.

కథ, సన్నివేశాల విషయంలో మరీ హద్దులు దాటిపోవడం, అంచనాలు మరీ ఎక్కువైపోవడం ఈ సినిమాకు మైనస్ అయింది. ‘అఖండ-2’ అనుకున్నంతగా ఆడని నేపథ్యంలో ఇక ఈ ఫ్రాంఛైజీకి తెరపడిపోతుందా అనే సందేహాలు కలిగాయి. కానీ అదేమీ లేదని తేల్చేశాడు దర్శకుడు బోయపాటి. అఖండ-3 కచ్చితంగా ఉంటుందని తాజాగా బోయపాటి క్లారిటీ ఇచ్చాడు. సోమవారం తిరుమల శ్రీవారిని దర్శించుకున్న బోయపాటి.. అఖండ-3పై మాట్లాడాడు.

అఖండ-3 కచ్చితంగా ఉంటుందని.. కానీ ఈ ఫ్రాంఛైజీలో సినిమాలకు మధ్య మధ్యలో గ్యాప్ అవసరమని.. బాలయ్య కమిట్మెంట్లు, తన కమిట్మెంట్లు చూసుకుని ఈ సినిమా చేస్తామని బోయపాటి అన్నాడు. ఇదే సమయంలో మెగాస్టార్ చిరంజీవి, నందమూరి బాలకృష్ణల కాంబినేషన్లో మల్టీస్టారర్ తీయడం గురించి బోయపాటి మాట్లాడాడు.

చిరు, బాలయ్య, నాగార్జున, వెంకటేష్ ఇండస్ట్రీకి నాలుగు పిల్లర్లని.. వీరిలో చిరు, బాలయ్య కాంబినేషన్లో సినిమా వస్తే అద్భుతంగా ఉంటుందని.. అది రావాలని బోయపాటి అన్నాడు. తనకు ఆ అవకాశం వస్తే కచ్చితంగా చేస్తానని, అంతకంటే అదృష్టమా అని బోయపాటి అన్నాడు.

టాలీవుడ్ ఇప్పుడు దేశంలోనే నంబర్ వన్ స్థాయిలో ఉందని.. మన సినిమా ఇంకా గొప్ప స్థాయికి వెళ్తుందని బోయపాటి వ్యాఖ్యానించాడు. తన కొత్త సినిమా గురించి అతి త్వరలో ప్రకటన వస్తుందని.. ఆ ప్రకటన చేయడానికి ముందు స్వామి వారి ఆశీస్సులు తీసుకోవాలనే తిరుమలకు వచ్చానని బ్ోయపాటి చెప్పాడు. తన తర్వాతి సినిమా పూర్తి చేశాక బోయపాటి అఖండ-3 చేసే అవకాశాలు కనిపిస్తున్నాయి.