ట్రెండింగ్ సాంగ్ ‘జిలేబి’ని ఎవరు వాడుకుంటారో

ఈ మధ్య సినిమాల్లో ఛార్ట్ బస్టర్ సాంగ్స్ కు కరువొచ్చి పడింది. ఆల్బమ్ మొత్తంలో ఒకటి రెండు పాటలు బాగుంటే అదే మహాప్రసాదంలా అయిపోయింది. ప్యారడైజ్ కు ఆయా షేర్, యెషనాగుల చేసిన మేలు ఎంతో మళ్ళీ చెప్పనక్కర్లేదు. అయితే ఒరిజినల్ కంపోజర్ కాకుండా బయట జనంలో తిరుగుతున్న ప్రైవేట్ పాటలను సరైన రీతిలో వాడుకుంటే అవి చేసే అద్భుతాలు అంతా ఇంతా కాదు. ఇరుముడిలో ముత్యాల పల్లకి కన్నా గొప్ప ఉదాహరణ అక్కర్లేదు. దీని కోసమే థియేటర్లకు వెళ్లిన ఆడియన్స్ ఉన్నారు.

ఇప్పుడీ ప్రస్తావనకు కారణం కొత్తగా సోషల్ మీడియాలో వైరలవుతున్న సాంగ్. ‘జిమ్ జిమ్ తార జిలేబి తేరా చిన్నోడా’ అంటూ ఒక మహిళ పాడిన సెల్ఫీ వీడియో సాంగ్ బాగా ప్రాచుర్యంలోకి వచ్చింది. దీనికి కొందరు డీజే రీమిక్స్ చేసి యూట్యూబ్ లో అప్లోడ్ చేయడంతో ఒక్కసారిగా వైరల్ కావడం మొదలయ్యింది. ఆవిడ మొహాన్నే చూపిస్తూ చిన్న చిన్న పదాలతో కూర్చిన సాహిత్యాన్ని మ్యూజిక్ లవర్స్ బాగా ఎంజాయ్ చేస్తున్నారు. ఆమె పాడిన అత్తరు సాయిబు లాంటి మరో రెండు పాటలు కూడా హిట్టయ్యాయి.

ఇదంతా చూస్తూ మనోళ్లు ఊరుకుంటారా. అప్పుడే ఈ పాటల హక్కుల కోసం ఆరాలు తీయడం మొదలయ్యాయట. జిమ్ జిమ్ తారాకు రీచ్ ఎక్కువ రావడంతో దాన్ని వాడుకునే దిశగా సదరు మహిళను సంప్రదించే పనిలో ఉన్నారని తెలిసింది. ఇలాంటివి థియేటర్లలో మంచి ఎక్స్ పీరియన్స్ ఇస్తాయి. జనాలు వెంటనే గుర్తు పట్టి కనెక్ట్ అయిపోతారు. ఆ మధ్య లిటిల్ హార్ట్స్ లో మౌళి చేసింది ఈ పనే. అదెంత బ్లాస్ట్ అయ్యిందో ఆడియన్స్ అంత సులభంగా మర్చిపోలేరు.

ఇంత పాజిటివ్ విషయంలోనూ సీరియస్ గా చూడాల్సిన మ్యాటర్ ఒకటుంది. ఒకప్పుడులా టాలీవుడ్ సంగీతంలో అద్భుతాలు జరగడం లేదు. ఇళయరాజా, రెహమాన్, కీరవాణి, డిఎస్పి టైంలో డిజాస్టర్లలో కూడా మంచి పాటలు ఉండేవి. కానీ ఇప్పుడు ఇండస్ట్రీ హిట్లలో కూడా గొప్ప పాటలు ఉండటం అరుదైపోయింది. అందుకే ఈ కరువు బయట ప్రైవేట్ సాంగ్స్ ఇంత ఆదరణ పొందేలా చేస్తోంది. ఏకంగా లక్షలు ఖర్చు పెట్టి హక్కులు కొనేలా చేస్తోంది. ట్రెండ్ అలా ఉన్నప్పుడు ఎవరైనా ఏం చేయగలరు.