గరివిడి లక్ష్మి చేస్తోంది పెద్ద సాహసమే

దసరా పండక్కు భారీ పోటీ నెలకొనడం చూస్తున్నాం. సంక్రాంతి రేంజులో మూడు పెద్ద సినిమాలు క్యూ కట్టడం బయ్యర్ వర్గాల్లో ఆశలు రేపుతోంది. కనీసం రెండు వర్కౌట్ అయినా థియేటర్లు కళకళలాడతాయని ఎదురు చూస్తున్నారు. అన్నింటి కన్నా ముందు ఆదర్శ కుటుంబం ఏకె 47 రానుండగా కేవలం ఒక రోజు గ్యాప్ తో రణబాలి, జైలర్ 2 తలపడనున్నాయి. అయితే కథ ఇక్కడితో అయిపోలేదు. ఇంత కాంపిటీషన్ కళ్లెదురు కనిపిస్తున్నా గరివిడి లక్ష్మి అనే చిన్న మూవీ పందేనికి సై అంటోంది.

ఆనంది టైటిల్ రోల్ పోషించిన ఈ బయోపిక్ ఒక నిజ జీవిత బుర్రకథ కళాకారిణిది. తొంభై దశకంలో ఉత్తరాంధ్ర ప్రాంతం విజయనగరానికి చెందిన గరివిడి లక్ష్మి అప్పట్లో జానపద ఆటపాటలతో జనాన్ని ఉర్రూతలూగించారు. కేవలం పదిహేను సంవత్సరాలలో పది వేలకు పైగా ప్రదర్శనలు ఇచ్చిన రికార్డు ఆవిడ సొంతం. ఎక్కడైనా జాతరలో లక్ష్మి బుర్రకథ ఉందంటే దూరం లెక్క చేయకుండా సైకిళ్ళ మీద కిలోమీటర్లు దాటి వచ్చి మరీ వినేంత అభిమానం ఆవిడ సొంతం.

అయితే లక్ష్మి ప్రయాణం అంతా పూల పాన్పు కాదు. ఎన్నో ఒడిదుడుకులు, అవమానాలు చూశారు. ఆరోగ్యాన్ని పట్టించుకోకుండా ఇరవై నాలుగు గంటలు ప్రదర్శనలు అంటూ వందల ఊళ్లు తిరుగుతూనే ఉండటం ప్రభావం చూపించింది. ఆవిడ పాటలను అమ్ముకుని ఆడియో క్యాసెట్ కంపెనీలు లక్షలు, కోట్లు సంపాదించినా ఈవిడకు నామ మాత్రంగా డబ్బులు చెల్లించేవాళ్ళు. ఈ క్రమంలో ఎన్నో మోసాలు జరిగాయి. అవన్నీ గరివిడి లక్ష్మి సినిమాలో చూపించబోతున్నారు.

రాజా సాబ్ డిజాస్టర్ తర్వాత చాలా గ్యాప్ తీసుకున్న పీపుల్స్ మీడియా ఫ్యాక్టరీ సంస్థ నుంచి వస్తున్న మూవీ ఇది. షూటింగ్ ఎప్పుడో పూర్తయినా రకరకాల కారణాల వల్ల రిలీజ్ వాయిదా పడుతూ వచ్చింది. దర్శకులు గౌరీ నాయుడు చాలా రీసెర్చ్ చేసి ఈ సినిమాని రూపొందించారు. రెండు పాటలు బాగానే రీచ్ అయ్యాయి. అంతా బాగానే ఉంది కానీ వెంకటేష్, రజనీకాంత్, విజయ్ దేవరకొండ లాంటి స్టార్లను తట్టుకుని ఆనందిని ఒంటరిగా తన గరివిడి లక్ష్మితో ఎలా మెప్పిస్తుందో చూడాలి.