ట్రబుల్ తట్టుకుని నిలబడుతుందా

రాజమౌళి ఫ్యామిలీ మొత్తం ప్రమోషన్లు చేసింది. మహేష్ బాబు, జూనియర్ ఎన్టీఆర్ ప్రత్యేకంగా పొడవైన ట్వీట్ రివ్యూలతో సినిమాను మెచ్చుకున్నారు. తారక్ ప్రీ రిలీజ్ ఈవెంట్ కు వచ్చి మంచి సందడి చేశాడు. ఆ వీడియోలకు బాగా రీచ్ వచ్చింది. హీరో ఫహద్ ఫాసిల్ రోజుల తరబడి హైదరాబాద్ లో ఉండి పబ్లిసిటీకి పూర్తి సహకారం అందించాడు. నిర్మాత ఎస్ఎస్ కార్తికేయ తన మార్కెటింగ్ నైపుణ్యం మొత్తం ఉపయోగించి టీజర్ నుంచి ప్రీమియర్ దాకా అన్నీ స్పెషల్ గా ప్లాన్ చేసుకున్నాడు.

ఇదంతా డోంట్ ట్రబుల్ ది ట్రబుల్ గురించని ప్రత్యేకంగా చెప్పనక్కర్లేదు. అయితే ఓపెనింగ్స్ కావొచ్చు లేదా వీకెండ్ అడ్వాన్స్ బుకింగ్స్ కావొచ్చు ఆశించినంత వేగంగా లేకపోవడం మూవీ లవర్స్ ని ఆశ్చర్యపరుస్తోంది. టాక్ ఎలా ఉందనేది పక్కన పెడితే ఇంత ప్రచారం చూశాక ఫస్ట్ వీక్ వరకు ఇలాంటి మూవీస్ ఎంతో కొంత హోల్డ్ రాబట్టుకుంటాయి. కానీ ట్రబుల్ ఈ విషయంలో కొంచెం ఎదురీదుతోంది. మెయిన్ సెంటర్స్ లో పర్వాలేదు కానీ కింది కేంద్రాల్లో ఎదురుగాలి ఉందని ట్రేడ్ టాక్.

నిజానికి టైటిల్ దగ్గరే సమస్య వచ్చిందని అధిక శాతం అభిప్రాయపడుతున్నారు. చిన్న పిల్లలని టార్గెట్ చేసిన సినిమా అయినప్పటికీ పేరు క్యాచీగా ఉంటే వాళ్ళతో పాటు రెగ్యులర్ ఆడియన్స్ కూడా అట్రాక్ట్ అవుతారు. ఇలా అర్థం కాకుండా ఇంత పొడవుగా పెడితే జనం నోళ్ళలో తిరిగదు. ఎంత బాలయ్య డైలాగు అయినా అది ఒక ఫ్లాప్ మూవీదని మర్చిపోకూడదు. కంటెంట్ లో ఏముందో ట్రైలర్ లో ముందే ప్రిపేర్ చేసినప్పటికీ అది పూర్తి స్థాయిలో రీచ్ కాలేకపోయింది.

వచ్చే వారం నుంచి ఆదర్శ కుటుంబం ఏకె 47, కామ్రేడ్ కళ్యాణ్, జైలర్ 2, రణబాలి, గరివిడి లక్ష్మి ఇలా వరసగా సినిమాలు క్యూ కట్టి ఉన్నాయి కాబట్టి డోంట్ ట్రబుల్ ది ట్రబుల్ కి ఈ మొదటి వారం చాలా కీలకం కానుంది. ఒకవేళ యునానిమస్ టాక్ వచ్చి ఉంటే ఏ సమస్యా ఉండేది కాదు. కానీ మిక్స్డ్ రెస్పాన్స్ ని దాటుకుని వెళ్లాలంటే మాత్రం పికప్ అనూహ్యంగా ఉండాలి. శశాంక్ యేలేటి దర్శకత్వం వహించిన ఈ మూవీలో చైల్డ్ ఆర్టిస్ట్ సారా పాలేకర్ నటన ప్రధాన ఆకర్షణగా నిలిచింది.