దుమారం రేపిన ద‌ర్శ‌కుడి తండ్రి ఇంట‌ర్వ్యూ

త‌మిళంలో పేరున్న ద‌ర్శ‌కుల్లో వెంక‌ట్ ప్ర‌భు ఒక‌రు. చెన్నై-28తో మొద‌లుపెట్టి చాలా హిట్లే ఇచ్చారు. చివ‌ర‌గా విజ‌య్ హీరోగా గ్రేటెస్ట్ ఆఫ్ ఆల్ టైం తీయ‌గా.. అది మిక్స్డ్ టాక్ తోనూ 400 కోట్లకు పైగా వసూళ్లు తెచ్చుకొని సూపర్ హిట్ అయ్యింది. ఐతే ఆ సినిమా త‌ర్వాత వెంక‌ట్ ప్ర‌భు కొత్త సినిమాను మొద‌లుపెట్ట‌లేదు. చాలా వేగంగా పెద్ద హీరోగా ఎదుగుతున్న శివ కార్తికేయ‌న్‌తో వెంక‌ట్ త‌ర్వాతి సినిమా ఉంటుంద‌ని వార్త‌లు వ‌చ్చాయి. శివ.. గ్రేటెస్ట్ ఆఫ్ ఆల్ టైంలో ఒక క్యామియో రోల్ కూడా చేశాడు.

ఐతే ఈ సినిమా స‌రిగా ఆడ‌క‌పోవ‌డం వ‌ల్లో, శివ‌కు వేరే కమిట్మెంట్లు ఉండ‌డం వ‌ల్లో.. వెంక‌ట్ ప్ర‌భుతో సినిమాను వెంట‌నే మొద‌లుపెట్ట‌లేక‌పోయాడు. ఈ ద‌ర్శ‌కుడేమో.. సినిమా చేయ‌కుండా ఖాళీగా ఉంటున్నాడు. ఈ నేప‌థ్యంలో వెంక‌ట్ ప్ర‌భు తండ్రి, ఇళ‌య‌రాజా త‌మ్ముడు.. స్వ‌యంగా సంగీత ద‌ర్శ‌కుడు అయిన గంగై అమ‌ర‌న్ లైన్లోకి వ‌చ్చారు.

ఒక ఇంట‌ర్వ్యూలో ఆయ‌న శివకార్తికేయన్ పేరెత్త‌కుండా అత‌డి మీద ఫైర్ అయిపోయాడు. ఒక హీరో త‌న కొడుకును కావాల‌నే వెయిట్ చేయిస్తున్నాడ‌న్న‌ట్లుగా మాట్లాడాడు. అత‌ను ఎంత పెద్ద హీరో అయినా కానీ, వెంక‌ట్ త‌న కోసం ఎందుకు ఎదురు చూడాలి, దీని వ‌ల్ల మ‌న కుటుంబానికి అవ‌మానం క‌దా.. వేరే సినిమా చేసుకోవ‌చ్చు క‌దా అంటూ ఆయ‌న ఆగ్ర‌హం వ్య‌క్తం చేశారు.

దీంతో శివ‌కార్తికేయ‌న్ పేరు సోష‌ల్ మీడియాలో ట్రెండ్ అవ‌డం మొద‌లైంది. ఇప్ప‌టికే కొన్ని కార‌ణాల వ‌ల్ల శివ మీద సోష‌ల్ మీడియాలో వ్య‌తిరేక‌త ఉంది. పెద్ద స్టార్ అయ్యాక అత‌డికి యాటిట్యూడ్ పెరిగింద‌ని, త‌న‌కు లైఫ్ ఇచ్చిన ధ‌నుష్‌ను కూడా అత‌ను లెక్క చేయ‌ట్లేద‌ని విమ‌ర్శిస్తుంటారు. ఇప్పుడు గంగై అమ‌ర‌న్ వ్యాఖ్య‌ల‌తో అత‌డి మీద ఎటాక్ ఇంకా ఎక్కువైంది. ఒక సీనియ‌ర్ ద‌ర్శ‌కుడిని అవ‌మానిస్తావా, వెయిట్ చేయిస్తావా అంటూ శివ మీద నెగెటివిటీ వైల్డ్ ఫైర్‌లా అంటుకోవ‌డంతో వెంక‌ట్ ప్ర‌భు స్పందించాల్సి వ‌చ్చింది.

శివ‌కార్తికేయ‌న్‌ను అపార్థం చేసుకోవ‌ద్ద‌ని, అత‌డితో త‌న‌కు మంచి స్నేహం ఉంద‌ని.. తామిద్ద‌రం క‌లిసి పని చేయాల‌నుకున్న‌ప్ప‌టికీ, వేరే కార‌ణాల‌తో ఇప్పుడు కుద‌ర‌డం లేద‌ని, త‌ర్వాత క‌చ్చితంగా సినిమా చేస్తామ‌ని వివ‌ర‌ణ ఇచ్చాడు వెంక‌ట్ ప్ర‌భు. ఈ పోస్టు మీద శివ కూడా స్పందించాడు. ఇంత చిన్న విష‌యానికి మీరెందుకు అంత సీరియ‌స్‌గా స్పందిస్తున్నారు.. మీకు ఎప్ప‌టికీ నేను ఫ్యాన్ బాయే .. వీలైన‌పుడు క‌లిసి ప‌ని చేద్దాం అని అత‌ను కామెంట్ చేశౄడు.